Կարող է ասենք՝ Արծվաշենը չենք ուզում, մյուս անկլավները մնան մեր տարածքում․ Փաշինյան․ ՏԵՍԱՆՅՈՒԹ

«Ոչ մի բան դեռևս որոշված չէ,- այդ մասին ԱԺ-Կառավարություն հարցուպատասխանի ժամանակ հայտարարեց ՀՀ վարչապետ Նիկոլ Փաշինյանը՝ անդրադառնալով անկլավների թեմային,- Հայաստանի և Ադրբեջանի անկլավների թեման գոյություն է ունեցել միշտ ու վաղուց: Հարցն ունի իրավական և քաղաքական կողմ»:

Փաշինյանը հիշեցրեց՝ անկլավների թեման քաղաքական մակարդակում գոյություն է ունեցել շատ վաղուց, այդ թվում՝ 1999 թ. տարածքների փոխանակման փաստաթղթի մեջ: Վարչապետի խոսքով՝ այն իրավիճակում, երբ Հայաստանն ու Ադրբեջանը ճանաչում են միմյանց 29.8 հազար և 86.6 հազար քառակուսի կիլոմետր տարածքային ամբողջականությունը, հարց է առաջ գալիս, իսկ ինչպե՞ս է լուծվելու անկլավների հարցը:

Փաշինյանն ասաց, որ Մյունխենում և Բրյուսելում քաղաքական մասով եղել է հետևյալ խոսակցությունը. «Մենք փոխադարձաբար ճանաչո՞ւմ ենք անկլավների գոյությունը, որ կա Արծվաշեն, որ պատկանում է, պատկանել է ՀՀ-ին, և անկլավներ հիմա, որ Հայաստանի տարածքում են, որոնք պատկանել են Ադրբեջանին: Այո՛, քաղաքական մակարդակում դա մենք ճանաչում ենք: Եվ ես ասել եմ, որ իրավական մակարդակում մենք լրացուցիչ հարցեր ունենք՝ առնվազն մի քանիսի հետ կապված»:

Նիկոլ Փաշինյանը նաև նշեց, որ խնդիրը լուծելու երկու տարբերակ կա. «Որը սահմանից այն կողմ է, մնում է սահմանից այն կողմ գտնվող երկրի տարածքում, որը սահմանից այս կողմ է, մնում է սահմանից այս կողմ գտնվող տարածքում»:

ՀՀ վարչապետը նաև նկատեց, որ եթե, ենթադրենք, հայկական կողմն ասի՝ Արծվաշենը չենք ուզում, մյուսները թող մնան մեր տարածքում, իրավական հարցեր կառաջանան, որովհետև եթե ասենք, որ Արծվաշենը չենք ուզում, ստացվում է՝ ՀՀ ինքնիշխան տարածքից ենք հրաժարվում։ Այստեղ որևէ բան որոշված չէ, կան քննարկումներ և, իմ պատկերացմամբ, այստեղ ճկունության շատ մեծ տեղ կա։

Եթե լինի հստակ պայմանավորվածություն Ադրբեջանի հետ, ես կգամ ու կասեմ, որ հարցի լուծումը հստակ պայմանավորվել ենք և այն այսպես է։ Այդ թեմայի վերաբերյալ որևէ վերջնական համաձայնություն չկա, կան մտքեր և տարբեր գաղափարներ, որոնցից ոչ մեկը մերժված չէ»,- եզրափակեց Փաշինյանը։

Մանրամասները՝ տեսանյութում։