Վրաստանն ու ՌԴ-ն գաղտնի բանակցություններ են վարում. վրացի պատգամավոր

Վրացի պատգամավորները պնդում են, որ Թբիլիսին և Մոսկվան գաղտնի բանակցություններ են վարում՝ «գաղտնի ակտիվ հաղորդակցություն»: Այս մասին հայտարարել է անկախ պատգամավոր Խաթիա Դեկանոիձեն։ Նա խորհրդարանականներ Աննա Նացվլիշվիլիի և Թեոնա Ակուբարդիայի հետ միասին հանդես է եկել հատուկ ճեպազրույցով, գրում է Գրուզիա օնլայնը։

Վրացի պատգամավորները սա համարում են «կառավարության դիվերսիոն գործունեություն»՝ երկրի անվտանգության ու եվրաինտեգրման ուղու դեմ։ Իսկ հարցերի պատասխանները չստանալու դեպքում, Նացվլիշվիլիի կարծիքով, սա կարող է ավարտվել կառավարության իմփիչմենթով։

Պատգամավորի խոսքով՝ օդային հաղորդակցության վերականգնումը, Ռուսաստան ծովային բեռների առաքման նոր երթուղիների վերականգնումը, ինչպես նաև Լավրովների ընտանիքի անդամների ժամանումը և պատժամիջոցների տակ գտնվող անձանց կողմից Վրաստանի սահմանը հատելը չեն կարող տեղի ունենալ առանց Վրաստանի իշխանությունների համաձայնության։

«Առանց ակտիվ շփումների դա անհնար կլիներ անել։ Ուստի մենք՝ յոթ պատգամավորներս, հարցեր ենք ուղղում Վրաստանի իշխանություններին և դրա համար պատասխանատու բոլոր գործադիր մարմիններին՝ այս հակասահմանադրական արարքի պատասխանատուներին, և պահանջում բացահայտ պատասխանել այն հարցերին, թե ի՞նչ գաղտնի բանակցություններ են տարվում Ռուսաստանի հետ, ե՞րբ են սկսվել գաղտնի բանակցությունները և ի՞նչ ուղիներ է դրա համար օգտագործում Վրաստանի ղեկավարությունը։ Ո՞ւմ նախաձեռնությունն էր գաղտնի բանակցություններ սկսելը. սա շատ կարևոր է, քանի որ Վրաստանի քաղաքացիները ոչ մի փուլում նախնական տեղեկատվություն չեն ունեցել, այդ թվում՝ ուղիղ չվերթների վերսկսման, ծովային բեռնափոխադրումների, ինչպես նաև լիազորված անձանց մուտքի մասին։ Կառավարության և խորհրդարանական մեծամասնության պատասխանատուները տեղյա՞կ էին այդ մասին, արդյո՞ք եղել են/կան գաղտնի այցեր Մոսկվա, ինչը նույնպես մտահոգիչ է մեր գործընկերների հետ հարաբերությունների վատթարացման համատեքստում, որն ակտիվացնում է Ռուսաստանի կողմից քաղաքական և տնտեսական էքսպանսիա։ Ուստի Վրաստանի ղեկավարությանը մեր հիմնական հարցն այն է, թե ինչպիսի գաղտնի բանակցություններ և պայմանավորվածություններ են ընթանում Ռուսաստանի հետ»,- ասել է Դեկանոիձեն։

Տաթև Ֆռանգյան