Օղանի դաշնակիցները համաձայն չեն Էրդողանին աջակցելու որոշմանը․ նրանք միանում են Քըլըչդարօղլուին

Այն բանից հետո, երբ Թուրքիայի նախագահական ընտրությունների առաջին փուլում ATA դաշինքի միասնական թեկնածու Սինան Օղանը հայտարարեց նախագահ Ռեջեփ Թայիփ Էրդողանին երկրորդ փուլում աջակցելու մասին, դաշինքի անդամ մյուս կուսակցություններն ու գործիչներն արագորեն երկրորդ փուլում ընդդիմադիր թեկնածու Քեմալ Քըլըչդարօղլուին սատարող տարբեր հայտարարություններ են արել, գրում է Bianet-ը։

«Նախնյաց դաշինքի»՝ ATA-ի մաս են կազմում «Հաղթանակ» (Զաֆեր), «Արդարություն» (Ադալետ), «Իմ երկիրը» (Ուլքեմ) կուսակցություններն ու «Թուրքիայի դաշինքը», որոնք նախագահական ընտրությունների առաջին փուլում մասնակցում էին Սինան Օղանի թեկնածությամբ։

Երեկ պարզվեց, որ «Հաղթանակ» կուսակցության նախագահ Ումիթ Օզդաղը համաձայն չէ Օղանի հետ։ Օզդաղը, նախօրեին հանդիպելով Քըլըչդարօղլուին, հայտարարել է, որ իրենք համաձայն չեն Օղանի կողմից Էրդողանին տված աջակցությունը և այսօր հայտարարություն կհրապարակեն։

«Արդարություն» կուսակցությունն էլ հենց նախօրեին է հայտարարել ընդդիմության թեկնածու Քըլըչդարօղլուին սատարելու մասին։ Կուսակցության նախագահ Վեջդեթ Օզը հայտարարել է, որ դաշինքում համագործակցությունն ավարտվել է և «կառավարությանն աջակցելն իրենց ծրագրերի մեջ չի մտնում»։

Հիշեցնենք, որ Սինան Օղանը, որը նախագահական ընտրությունների առաջին փուլում հավաքել է 2 միլիոն 831 հազար 239 ձայն (5,17 տոկոս), նախօրեին հայտարարել է մայիսի 28-ին կայանալիք նախագահական ընտրությունների երկրորդ փուլում գործող նախագահ Ռեջեփ Թայիփ Էրդողանին աջակցելու մասին։

Էմմա Չոբանյան