16.05.2026 | 21:37
Փաշինյանը ներկայացրել է վարորդական իրավունքից զրկված անձանց խնդրի լուծման իր տարբերակը
ՌԴ սահմանամերձ շրջաններում անվտանգության սպառնալիքներն աճում են․ բրիտանական հետախուզություն
Քաղաքականություն
23.05.2023 | 15:10
Բրիտանական հետախուզությունն այսօրվա զեկույցում նշում է, որ Մոսկվան կարող է օգտագործել պարտիզանական խմբերի ներաթափանցման դեպքերը սահմանամերձ շրջաններ՝ որպես «ապացույց», որ հենց Ռուսաստանն է հանդիսանում «պատերազմի զոհ», գրում է BBC-ի ռուսական ծառայությունը։
Զեկույցի հեղինակները նշում են, որ մայիսի 19-22-ը Բելգորոդի շրջանում ռուս զինվորականների և պարտիզանական խմբավորումների միջև բախումներ են տեղի ունեցել առնվազն երեք վայրերում։ Ստույգ ասել, թե ինչ խմբերի մասին է խոսքը, դեռևս հնարավոր չէ, սակայն «Ռուսաստանի Ազատության լեգեոնը»՝ կամավորական ստորաբաժանում, որը, իբր, կռվում է Ուկրաինայի կողմից (կազմակերպությունը հայտարարվել է ահաբեկչական և արգելված է Ռուսաստանում), հաղորդել է ՌԴ տարածք մուտք գործելու մասին։ Լեգեոնի մարտիկների խոսքով՝ իրենք գործողությունն իրականացրել են «Ռուսական կամավորական կորպուսի» հետ միասին։
Ամենալուրջ բախումները տեղի են ունեցել Գրայվորոն քաղաքի շրջանում։ Բախումների պատճառով Ռուսաստանը տարհանել է մի քանի գյուղեր և լրացուցիչ ուժեր ուղարկել այն շրջաններ, որտեղ ընթացել են մարտերը։
Բրիտանական հետախուզությունը նշում է, որ Ռուսաստանի սահմանամերձ շրջաններում սպառնալիքները վերջին շրջանում զգալի ավելացել են․ երկաթուղիներում դիվերսիաներին, մարտական ավիացիայի կորստին հիմա էլ ավելացել են պարտիզանական խմբերի հետ բախումները, որոնք ներթափանցում են ՌԴ տարածք։
Էմմա Չոբանյան
