Ուկրաինական ԶՈՒ-ն մտե՞լ է ՌԴ տարածք․ ինչ են հայտնում ռուսական և ուկրաինական կողմերը

ՌԴ Բելգորոդի մարզի նահանգապետ Վյաչեսլավ Գլադկովը հայտնել է, որ Ուկրաինայի Զինված ուժերի դիվերսիոն-հետախուզական խումբը մտել է Բելգորոդի մարզի Գրայվորոնսկի շրջանի տարածք, գրում է BBC-ի ռուսական ծառայությունը։

«ՌԴ Զինված ուժերը սահմանապահ ծառայության, Ռուսաստանի գվարդիայի և ԱԴԾ-ի հետ միասին ձեռնարկում են անհրաժեշտ միջոցներ՝ հակառակորդին վերացնելու համար»,- գրել է նա իր Telegram-ալիքում։

Մինչ այդ, Ուկրաինայի ՊՆ գլխավոր հետախուզության վարչության ներկայացուցիչ Անդրեյ Յուսովը հայտարարել է, որ ՌԴ Բելգորոդի մարզում «ուկրաինացիների պաշտպանության համար անվտանգության գոտի է ստեղծվում», փոխանցում է Korrespondent-ը։

«Այո՛, այսօր «Ռուսաստանի կամավորական կորպուսը» և «Ռուսաստանի Ազատության լեգեոնը», որը բաղկացած է Ռուսաստանի Դաշնության քաղաքացիներից, սկսեցին Բելգորոդի շրջանի այս տարածքները, այսպես կոչված, պուտինյան ռեժիմից ազատագրելու և հակառակորդին հետ մղելու գործողությունը, որպեսզի ստեղծեն որոշակի անվտանգության գոտի՝ Ուկրաինայի խաղաղ բնակչությանը պաշտպանելու համար»,- ասել է Յուսովը։

Հիշեցնենք, որ այսօր ավելի վաղ Բելգորոդի շրջանի իշխանությունները հայտնել էին, որ Գրայվորոնսկի շրջանը գտնվում է Ուկրաինայի զինված ուժերի կրակոցների թիրախում։

Ուկրաինական և ռուսական Telegram ալիքները հայտնել են, որ Ռուսաստանի սահմանին մարտեր են տեղի ունեցել ուկրաինացի մարտիկների հետ։ Մասնավորապես, հաղորդվել է, որ հարձակման է ենթարկվել ռուսական «Գայվորոն» անցակետը։

Տաթև Ֆռանգյան