Խաղաղության պայմանագրի երաշխավորի մասով ըմբռնման փոփոխություն կա․ Փաշինյան․ ՏԵՍԱՆՅՈՒԹ

Մոսկվայի հանդիպումը հինգշաբթի օրն է, և չեմ կարծում, որ իրատեսական է մինչև այդ խաղաղության պայմանագրի ստորագրումը։ Այս մասին այսօր մամուլի ասուլիսի ժամանակ նշեց ՀՀ վարչապետ Նիկոլ Փաշինյանը:

«Եթե կոմունիկացիաների բացման վերաբերյալ կհաջողվի գալ ընդհանուր հայտարարի, դուք գիտեք՝ մեր մոտեցումները և սկզբունքները, բացառել չեմ կարող:

Ես ասացի, որ մեր խնդիրն է հնարավորինս արագ ավարտին հասցնել բանակցությունները և ստորագրել խաղաղության պայմանագիր: Համենայնդեպս, մեր թիմը շատ ինտենսիվ է աշխատում:
Դուք գիտեք, որ Վաշինգտոնից առաջ մենք մեր խմբագրումները նորից փոխանցել ենք ադրբեջանական կողմին: Եթե չեմ սխալվում, դա 4-րդ խմբագրումն էր: Հիմա մենք, ըստ էության, իրենց արձագանքին ենք սպասում, որը, հույս ունենք՝ կարտահայտի Վաշինգտոնում տեղի ունեցած քննարկումները, ըմբռնումը, պայմանավորվածությունները, այն ըմբռնման առաջընթացը, որն արձանագրվել է:
Ադրբեջանն, օրինակ, այս շաբաթ եթե փոխանցի իր արձագանքները, և եթե մեկ շաբաթը բավարար է վերլուծելու համար, եթե տեսնենք այդ առաջարկները, և եթե մոտեցումները համարենք ընդունելի փոխզիջումային տրամաբանության մեջ, ինչո՞ւ չէ: Բայց այս պահին դեռևս չենք ստացել իրենց արձագանքները»,- նշեց վարչապետը:

Միջազգային երաշխավորի առումեվ վարչապետը նշեց․ «Այդ թեմայով, կարծես թե, ըմբռնման որոշակի փոփոխություն կա:
«Երաշխավորը, եկեք պայմանական ասենք, որովհետև բանակցային գործընթացի ընթացքում այդ ֆունկցիան նկարագրող այլ տերմիններ ևս առաջարկվել են, երաշխավոր լինելը այսպիսի բարդ տարածաշրջանում շատ մեծ պատասխանատվություն է, որը շղթայական և՛ հնարավորություններ կարող է առաջացնել երկրների համար, և՛ ռիսկեր, կարող է հեղինակությունը բարձրացնել, և կարող է հեղինակությանը լրջորեն վնասել:
Այս առումով այնպես չէ, որ բոլորը խանդավառված են և իրար հերթ չտալով ուզում են, որ այդ դերը ստանձնեն: Բայց միաժամանակ, եթե միջազգային հանրությունն արձանագրի, որ կողմերի միջև իսկապես անկեղծ ցանկություն կա տևական խաղաղություն հաստատելու, կարծում եմ, որ կլինեն երկրներ և կազմակերպություններ, սկսած առանձին երկրներից, ավարտած ՄԱԿ-ի ԱԽ-ով, որ ոչ թե կցանկանան, այլ կհամաձայնեն ստանձնել այդ գործառույթը»,-նշեց Փաշինյանը՝ հավելելով՝ ես ընդամենը տպավորություն եմ կիսում այս պահին իմ ունեցած քննարկումների հիման վրա։

Մանրամասները՝ տեսանյութում։