Ռուսաստանը տարիներով սպառնալիք է մնալու․ Ավստրիայի ԱԳ նախարար

Ռուսաստանը դեռ երկար տարիներ մնալու է սպառնալիք: Ուստի Ուկրաինային անհրաժեշտ են անվտանգության արևմտյան երաշխիքներ։ Այս մասին հայտարարել Ավստրիայի արտաքին գործերի նախարար Ալեքսանդր Շալենբերգը գերմանական Die Welt-ին տված հարցազրույցում, գրում է DW-ի ռուսական ծառայությունը։

Ավստրիայի ԱԳ նախարարը, միաժամանակ, կարծիք է հայտնել, որ մինչև ընթացիկ տասնամյակի ավարտը Ռուսաստանում քաղաքական ղեկավարությունը դժվար թե փոխվի։

«Ես չեմ ելնում նրանից, որ Ռուսաստանում քաղաքական համակարգն ու քաղաքական ղեկավարությունն այս տասնամյակի ավարտին էական կփոխվի։ Մենք պետք է ապրենք նրանով, որ մեր հարաբերությունները Ռուսաստանի հետ մնալու են խաթարված, քանի որ բացակայում է ամենակարևորը կապիտալը՝ վստահությունը»,- ասել է նա։

Շալենբերգը նշել է, որ իր գնահատմամբ՝ Արևմուտքը, ներառյալ՝ Ուկրաինան, ապագայում չեն կարող հույսը դնել այն բանի վրա, որ Ռուսաստանը հավատարիմ է մնալու տարբեր պայմանագրերի։ Նրա խոսքով՝ Արևմուտքը պետք է հաստատակամություն դրսևորի Ուկրաինայում ռազմական հանցագործություններ կատարած ռուսներին հետապնդելու հարցում, ինչպես նաև «քաղաքական ղեկավարությանը պատասխանատվության ենթարկելու հարցում ռազմական հանցագործությունների և ագրեսիայի հանցագործության համար»:

Միաժամանակ, ավստրիացի պաշտոնյան նշել է, որ չնայած Ուկրաինայում շարունակվող պատերազմին և Ռուսաստանի դեմ լայնածավալ պատժամիջոցներին, Ավստրիայի կառավարությունը շարունակում է Մոսկվայի հետ հաղորդակցվել ոչ պաշտոնական ուղիներով։

«Արևմուտքը պետք է շարունակի խոսել Ռուսաստանի հետ, դա անում է նաև ԱՄՆ վարչակազմը։ Մենք գլոբալ պատասխանատվություն ենք կրում։ Ռուսաստանը չի վերացել աշխարհի քարտեզից»,- հավելել է Ավստրիայի ԱԳ նախարարը։

Էմմա Չոբանյան