Հանրահավաք՝ ի պաշտպանություն արցախցիների

Ի պաշտպանություն արդեն հինգ ամիս շրջափակված Արցախի՝ մի խումբ քաղաքացիներ նախօրեին հանրահավաք էին կազմակերպել Կոռնիձորում։ «Կամավորական շարժում» ՀԿ կազմակերպած հանրահավաքի մասնակիցները երթով Կոռնիձոր գյուղի կենտրոնից շարժվել են դեպի սահմանային հատված, որտեղ էլ տեղի է ունեցել բուն հանրահավաքը:

«Թշնամին այսօր ցույց է տալիս իր գլխավոր հարվածի ուղղությունն՝ Լաչինի անցակետը դնելով։ Նա մեզ ուզում է բաժանել, որովհետև գիտի՝ բաժանելով կարելի է տիրել այս ժողովրդին»,- հավաքված մասնակիցներին դիմելով՝ ասել է «Հայաստան» խմբակցության պատգամավոր Արմեն Ռուստամյանը։

Ակցիայի մասնակիցների գործողությունները հեռակա ողջունել էր Արցախի Ազգային ժողովի նախագահ Արթուր Թովմասյանը.

«Յուրաքանչյուր գործողություն, որ կատարվում է ի զորակցություն Արցախի ու արցախահայության, ողջունելի ու գնահատելի է։ Ձեր ուղերձում նախանշած կետերը ձնագնդի էֆեկտը պետք է ունենան։ Համայն հայության համերաշխությամբ ու հանդուրժողականությամբ միայն կարող է իրականություն դառնալ ցանկացած հայրենանպաստ նախաձեռնություն։ Արցախահայության վճռական կամքն անբեկանելի է, Արցախի ազատության և ինքնորոշման իրավունքի իրացման հարցում ունեցած դիրքորոշումը՝ անփոփոխ»,- նշել էր նա։

Հանրահավաքին մասնակցել են Հայաստանի տարբեր մարզերից և Երևանից ժամանած մեծ թվով քաղաքացիներ, քաղաքական և հասարակական գործիչներ:

Կոռնիձրի հանրահավաքի մասնակիցներին հեռակա միացել են նաև Արցախում՝ նույնպես երթ և հանրահավաք անցկացնելով։