Մոսկվան և Կիևը պայմանավորվել են ընդունել Հռոմի պապի դեսպաններին

Հռոմի Ֆրանցիսկոս պապն ակնկալում է իր խաղաղության բանագնացներին ուղարկել Ուկրաինայի և Ռուսաստանի նախագահների հետ բանակցությունների՝ պատերազմում ռազմական գործողությունների դադարեցման փորձի համար, փոխանցում է VOA-ն:

Վատիկանի նորությունների մեջ մասնագիտացած Il Sismografo կայքն էլ նշում է, որ խոսքը հենց այն առաքելության մասին է, որի մասին Ֆրանցիսկոս պապը հայտարարել է մոտ երեք շաբաթ առաջ Հունգարիայից վերադառնալիս։ Քահանայապետն այն ժամանակ մանրամասներ չի հայտնել:

Ըստ Il Sismografo-ի՝ ծրագրվում էր, որ Բոլոնիայի արքեպիսկոպոս, կարդինալ Մատեո Զուպին կմեկնի Կիև՝ Վլադիմիր Զելենսկիի հետ բանակցությունների, իսկ Վատիկանի արևելյան եկեղեցիների բաժնի ղեկավար արքեպիսկոպոս Կլաուդիո Գուջերոտին կմեկնի Մոսկվա՝ հանդիպելու Վլադիմիր Պուտինի հետ։

Առանց աղբյուրների կամ մանրամասների՝ կայքը նշում է, որ երկու նախագահներն արդեն պայմանավորվել են հանդիպել պապական բանագնացների հետ։ Կրեմլը և Ուկրաինայի նախագահի գրասենյակը դեռևս չեն մեկնաբանել լուրը։

Վատիկանի խոսնակ Մատեո Բրունին ասել է, որ որևէ մեկնաբանություն չունի Il Sismografo-ի հրապարակման վերաբերյալ։ Միաժամանակ, Բրունին հիշեցրել է Վատիկանի պետքարտուղար Պիետրո Պարոլինի վերջին խոսքերը, որը նշել է, որ «ժամանակն է հանդես գալ Ուկրաինայում արդար խաղաղություն հաստատելու նախաձեռնությամբ»։

Ուկրաինայի նախագահ Վլադիմիր Զելենսկին անցած շաբաթ Վատիկանում հանդիպել է Ֆրանցիսկոսի պապին։ Սակայն իր հետագա մեկնաբանություններում Զելենսկին կարծես թե նսեմացնում էր պապական միջնորդության հնարավորությունը, նշում է Reuters-ը։

Տաթև Ֆռանգյան