Անկախ նրանից ՝ բանակցությունները տեղի կունենան Առլինգթոնում, Բրյուսելում, թե Մոսկվայում, մեր աջակցությունը կշարունակվի․ Պետդեպի խոսնակ

Մայիսի 25-ին Մոսկվայում նախատեսվում է Փաշինյան-Պուտին-Ալիև հանդիպում։ Այս մասին մայիսի 18-ի կառավարության նիստի ընթացքում ասել է ՀՀ վարչապետ Նիկոլ Փաշինյանը։

«Ռուսական կողմից ստացել ենք արդեն առաջարկ՝ Ռուսաստանի Դաշնության նախագահի միջնորդությամբ բաձրագույն մակարդակով եռակողմ հանդիպում անցկացնել Մոսկվայում՝ մայիսի 25-ին, և մենք ընդունել ենք այդ առաջարկը»,- ասել է Փաշինյանը:

Չնայած Ռուսաստանի վրա ԱՄՆ-ի ճնշմանը՝ Պետդեպարտամենտի խոսնակ Վեդանտ Պատելը ողջունել է առաջնորդների միջև նոր բանակցությունները:

«Մենք կարծում ենք, որ կողմերի միջև ուղիղ բանակցությունները չափազանց կարևոր են, և մենք ուրախ ենք, որ դրանք տեղի են ունենում», – ասել է նա լրագրողներին Վաշինգտոնում:

«Անկախ նրանից՝ դրանք տեղի կունենան Առլինգթոնում, Բրյուսելում, թե Մոսկվայում, մեր աջակցությունը (այդ ջանքերին-խմբ․) կշարունակվի», – ասել է նա:

Հիշեցնենք՝ արտաքին գործերի նախարարների մակարդակով մայիսի 19-ին հանդիպում է սպասվում Մոսկվայում: Հայաստանի արտաքին գործերի նախարարը մեկնել է արդեն Մոսկվա:

Հավելենք, որ մայիսի 14-ին Բրյուսելում տեղի էր ունեցել Հայաստանի վարչապետ Նիկոլ Փաշինյանի, Ադրբեջանի նախագահ Իլհամ Ալիևի և Եվրոպական խորհրդի նախագահ Շառլ Միշելի եռակողմ  հանդիպումը։ Մայիսի 1-4-ն էլ Վաշինգտոնում ԱՄՆ պետքարտուղար Էնթոնի Բլինքենի միջնորդությամբ բանակցություններ էին տեղի ունեցել  Հայաստանի ԱԳ նախարար Արարատ Միրզոյանի ու Ադրբեջանի ԱԳ նախարար Ջեյհուն Բայրամովի միջև։