13.12.2024 | 23:31
Գերմանիան հավանություն է տվել 2006թ․ ի վեր զենքի ամենամեծ արտահանմանը Թուրքիա
Քըլըչդարօղլուն կոշտացնում է հռետորաբանությունը՝ խոստանալով փախստականներին հետ ուղարկել իրենց երկրներ
Քաղաքականություն
18.05.2023 | 21:40
Թուրքիայի նախագահական մրցապայքարում Ռեջեփ Թայիփ Էրդողանի մրցակիցը՝ ընդդիմության միասնական թեկնածու Քեմալ Քըլըչդարօղլուն խստացրել է միգրանտների նկատմամբ վերաբերմունքը՝ խոստանալով մայիսի 28-ին կայացած քվեարկության երկրորդ փուլով ընտրվելուց հետո բոլոր միգրանտներին հետ ուղարկել իրենց երկրներ, գրում է Reuters-ը։
Քըլըչդարօղլուն նախագահական ընտրությունների առաջին փուլում ստացել է ձայների շուրջ 45 տոկոսը, իսկ Էրդողանը՝ 49,5 տոկոսը։ Քըլըչդարօղլուի վերջին մեկնաբանությունները հնչում են այն ակնկալիքների ֆոնին, որ նախագահական մրցավազքում երրորդ թեկնածուն կհայտարարի երկրորդ փուլի համար իր որոշումը:
Սինան Օղանը՝ ազգայնական քաղաքական գործիչ, որին պաշտպանում է փախստականների դեմ պայքարող կուսակցությունը, հավաքել է 5,2 տոկոս, ինչը նրան դարձրել է առանցքային դերակատար քվեարկության երկրորդ փուլում:
«Էրդողան, դու միտումնավոր 10 միլիոն փախստականի թողեցիր Թուրքիա, նույնիսկ Թուրքիայի քաղաքացիությունը վաճառքի հանեցիր՝ ներկրվող ձայներ ստանալու համար։ Այստեղ ես հայտարարում եմ՝ բոլոր փախստականներին տուն կուղարկեմ, երբ ընտրվեմ որպես նախագահ»,- ասել է Քըլըչդարօղլուն իր գլխավորած կուսակցության կենտրոնակայանում տեղի ունեցած հանդիպմանը։
Հավելենք, որ ավելի վաղ նախընտրական քարոզարշավի ժամանակ Քըլըչդարօղլուն ասել էր, որ մտադիր են երկու տարվա ընթացքում տուն ուղարկել Թուրքիայում գտնվող սիրիացիներին՝ Սիրիայի նախագահ Բաշար ալ-Ասադի հետ գործարք կնքելուց հետո և գործընթացը ՄԱԿ-ի հետ համակարգելով։
Էմմա Չոբանյան
