10.04.2026 | 23:49
Դմիտրի Մեդվեդևը ՌԴ հասարակագիտության դպրոցական դասագրքերի գլխավոր խմբագիրն է դարձել
Ռուսաստանի բյուջեի դեֆիցիտն արդեն գերազանցել է ամբողջ 2023 թվականի պլանը
Քաղաքականություն
18.05.2023 | 17:50
Ռուսաստանի բյուջեի դեֆիցիտը շարունակում է աճել՝ հաշվի առնելով աճող ծախսերը։ Պատերազմական պայմաններում իշխանությունները գրեթե հնարավորություն չունեն կրճատելու ծախսերը։ Որքա՞ն խնայողություններ պետք է արվեն մոտ ապագայում, և արդյո՞ք պահուստները կկարողանան ծածկել աճող բացը, հարցադրում է արել BBC-ի ռուսական ծառայությունը։
Հունվար-ապրիլի արդյունքներով՝ բյուջեի դեֆիցիտը կազմել է ռեկորդային 3,4 տրիլիոն ռուբլի։ Աշնանը իշխանությունները պլանավորել են, որ ամբողջ 2023 թվականի համար բյուջեի դեֆիցիտը զգալիորեն ցածր կլինի 2,9 տրիլիոն ռուբլուց։
Բյուջեի եկամուտները շարունակում են նվազել․ հունվար-ապրիլին դրանք կազմել են 7,8 տրիլիոն ռուբլի, ինչը 22%-ով ցածր է անցած տարվա նույն ժամանակաշրջանի համեմատ։ Նավթագազային եկամուտները նվազել են 52%-ով, իսկ ծախսերը զգալիորեն աճում են։
Մայիսին բյուջեի հետ կապված իրավիճակը որոշակիորեն լավացել է։ Օպերատիվ տվյալների համաձայն՝ աճի տեմպը դանդաղել է, սակայն հնարավոր է՝ պատճառը երկարօրյա մայիսյան տոներն են։ Բյուջեի դեֆիցիտը, ճիշտ է, ամեն դեպքում կազմում է մի փոքր ավելի, քան 4 տրիլիոն ռուբլին, սակայն ամսվա արդյունքներով կարող է ավելի պակաս լինել, քանի որ եկամուտների մի մասը ստացվում է ամսվա վերջին։
Չորեքշաբթի ՌԴ Ֆինանսների նախարարությունը տևական ժամանակի ընթացքում առաջին անգամ հրապարակել է տվյալներ համախմբված բյուջեի վերաբերյալ. դրանք ամփոփում են դաշնային բյուջեի և մարզերի բյուջեների հետ կապված իրավիճակը: Առայժմ դրանք հասանելի են միայն հունվար և փետրվար ամիսներ համար, սակայն այնտեղ պակասուրդն ավելի մեծ է՝ ավելի քան 6 տրիլիոն ռուբլին։
Դեֆիցիտը ծածկելու համար իշխանություններն օգտագործում են Ազգային բարեկեցության հիմնադրամի միջոցները՝ Ռուսաստանի հիմնական պահուստային ֆոնդը։ Ամենայն հավանականությամբ, դրանք կբավականացնեն առաջիկա մի քանի տարիների համար, բայց իշխանությունները կարող են փորձել ավելի երկար ձգձգել դրանք՝ կկրճատեն այլ ծախսեր կամ պարտք կվերցնեն բնակչությունից։
Նույն հսկայական ծախսերը կարող են լինել պատերազմի և պատժամիջոցների ֆոնին ռուսական տնտեսության անսպասելի կայունության պատճառներից մեկը. ճգնաժամը, պարզվեց, շատ ավելի խորն էր, քան կարծում էին տնտեսագետները։ Միգուցե իշխանություններն ուղղակի փողով են հեղեղել նրան։
Տաթև Ֆռանգյան
