07.10.2026 | 23:48
Արթուր Դանիելյանը կալանավորվեց
Ֆրանսիայի նախկին նախագահ Նիկոլա Սարկոզիի՝ կոռուպցիայի գործով վերաքննիչ բողոքը մերժվել է
Քաղաքականություն
17.05.2023 | 18:50
Ֆրանսիայի նախկին նախագահ Նիկոլա Սարկոզին պարտվել է կոռուպցիայի և դատավորին կաշառելու փորձի մեղադրանքով 2021 թվականի մարտին կայացված դատավճռի դեմ բողոքարկումը, գրում է BBC-ի ռուսական ծառայությունը։
Նա դատապարտվել էր երեք տարի ժամկետով ազատազրկման, որից երկուսը՝ պայմանական։
Փարիզի վերաքննիչ դատարանը նաև որոշում է կայացրել, որ Սարկոզին կարող է խուսափել բանտից և մեկ տարի անցկացնել տանը, ընդ որում՝ նրա տեղաշարժը վերահսկելու համար կիրառվելու է էլեկտրոնային ապարանջան։ Նրան երեք տարով արգելել են պետական պաշտոններ զբաղեցնել։
Հիշեցնենք, որ 2021 թվականի մարտի 1-ին դատարանը Սարկոզիին դատապարտել է երեք տարվա ազատազրկման, այսպես կոչված, 2014 թվականի գաղտնալսման գործով։ Այնուհետև նա և նրա փաստաբան Թիերի Էրզոգը մեղավոր էին ճանաչվել դատախազ Ժիլբեր Ազիբերից մեկ այլ գործի հետաքննության վերաբերյալ անօրինական տեղեկատվություն ստանալու փորձի մեջ՝ L’Oreal-ի հիմնադիր Լիլիան Բետանկուրի դստեր կողմից 2007 թվականի նախագահական արշավի ենթադրյալ անօրինական ֆինանսավորման մասին:
Քննիչների խոսքով՝ Սարկոզին և Էրզոգը տեղեկությունների դիմաց Ազիբերին խոստացել են պաշտոն Մոնակոյում, սակայն չեն կատարել այդ խոստումը։ Դատախազությունը, սակայն, այդ դրվագը համարել է կոռուպցիոն դրսևորում։
Սարկոզիի փաստաբանները բողոքարկել էին որոշումը, և մինչ դատարանը քննում էր բողոքը, նախկին նախագահն ազատության մեջ էր։
Տաթև Ֆռանգյան
