Էրդողանը վրդովված է ընտրություններում իր կուսակցության ձայների նվազումից

Թուրքական Cumhuriyet-ի փոխանցմամբ՝ Կենտրոնական գործադիր խորհրդի՝ վերջերս կայացած հանդիպման ժամանակ Թուրքիայի նախագահ Թայիփ Էրդողանը իր զայրույթն է արտահայտել կուսակցության անդամներին՝ կապված իր գլխավորած ԱԶԿ-ի (Արդարություն և զարգացում կուսակցություն) ձայների 42%-ից 35%-ի նվազման հետ, գրում է Gercek news-ը։

Նշվում է, որ Էրդողանը հիշատակել է սխալները, որոնք արվել են կուսակցության նախընտրական ցուցակներում թեկնածուների ընտրության հարցում, որը հանգեցրել է մի շարք նահագներում հանրության վստահության բացակայությանը։ Նա հայտարարել է, որ քարոզարշավին պետք է ավելի արդյունավետ աշխատանք կատարվեր, իսկ կուսակցության թեկնածուներին ընտրողները չեն պաշտպանել, ինչը հանգեցրել է խորհրդարանում մանդատների նվազման։

Աղբյուրները նշում են, որ նախագահ Էրդողանի գլխավորած հանդիպման ժամանակ քննարկված հիմնական թեմաներից մեկը ձայների անկման պատճառներն են եղել։ Ժողովի ընթացքում նաև որոշում է կայացվել նախագահական ընտրությունների երկրորդ փուլի համար Ազգայնական շարժում կուսակցության (MHP) հետ համատեղ ընտրական գրասենյակներ ստեղծել։ Էրդողանն այս երկու կուսակցությունների նախագահի միասնական թեկնածուն է։

Հավելենք, որ 2018 թվականի ընտրություններին ԱԶԿ-ն ստացել էր 42,56 տոկոս ձայն՝ 295 պատգամավորական մանդատ։ Սակայն անցած կիրակի՝ մայիսի 14-ին անցկացված ընտրություններում ԱԶԿ-ն չի կարողացել նախկին հաջողությունը կրկնել․ Ձայները նվազել են՝ հասնելով 35,58 տոկոսի՝ 267 պատգամավորական մանդատի հնարավորությամբ։

Էմմա Չոբանյան