Պաշտոնական Անկարան քննադատել է Թուրքիայում ընտրությունների վերաբերյալ ԵԱՀԿ-ի զեկույցը

Թուրքիայի ԱԳՆ-ն հայտարարություն է տարածել, որում քննադատում է մայիսի 14-ին երկրում կայացած նախագահական և խորհրդարանական ընտրությունների վերաբերյալ ԵԱՀԿ դիտորդական առաքելության զեկույցը։ Ըստ Անկարայի՝ զեկույցը չի համապատասխանում քվեարկության գործընթացի անկախ և անաչառ մոնիտորինգի սկզբունքներին։ «Զեկույցում առկա մի շարք քաղաքական և մեղադրական հայտարարություններ, որոնք դուրս են գալիս ընտրական գործընթացից և չեն համապատասխանում անկախ և անաչառ մոնիտորինգի սկզբունքներին, ցավալի են», – ասվում  է ԱԳՆ հայտարարության մեջ։

Թուրքիայի ԱԳՆ-ն սպառնում է, որ «քաղաքական դրդապատճառներով և կողմնակալ մեկնաբանությունները կարող են խաթարել ԵԱՀԿ դիտորդական առաքելությունների վստահությունը»։

Հայտարարությունում նշվում է, որ ընտրություններին ընդհանուր առմամբ հետևել է 489 միջազգային դիտորդ։ «Իրենց զեկույցներում  դիտորդները ընդգծել են, որ ընտրություններն անցել են ազատ ժողովրդավարական ընտրությունների չափանիշներին համապատասխան և օրինակելի բարձր մասնակցությամբ», – ասվում է հայտարարության մեջ։

Հավելենք, որ ԵԱՀԿ դիտորդական առաքելության հայտարարության մեջ ասվում է, որ գործող նախագահը և իշխող կուսակցությունները օգտվել են չարդարացված առավելությունից:  Հավաքների, միավորումների և արտահայտվելու հիմնարար ազատությունների շարունակական սահմանափակումները խոչընդոտել են որոշ ընդդիմադիր քաղաքական գործիչների և կուսակցությունների, ինչպես նաև քաղաքացիական հասարակության և անկախ լրատվամիջոցների մասնակցությանը։

Էմմա Չոբանյան