04.11.2024 | 22:30
Հայաստանի մի շարք հասցեներում էլեկտրաէներգիայի անջատումներ կլինեն
ՌԴ-ն փորձում է ուժեղացնել հարձակողական գործողությունները Բախմուտում՝ ուկրաինական հարձակումների ֆոնին․ ISW
Քաղաքականություն
17.05.2023 | 18:11
Ռուսական զորքերը, հավանաբար, որոշել են ուժեղացնել մարտավարական հարձակումները Բախմուտի շրջանում, մինչդեռ Ուկրաինան կենտրոնացել է սահմանափակ և տեղայնացված հակագրոհների վրա։ Այս մասին նշում է Պատերազմի ուսումնասիրության ամերիկյան ինստիտուտը (ISW) իր ամենօրյա ամփոփագրում, գրում է BBC-ի ռուսական ծառայությունը։
Նախօրեին ինքնահռչակ Դոնեցկի Հանրապետության առաջնորդ Դենիս Պուշիլինը հայտարարել էր, որ ռուսական ուժերը շարունակում են առաջխաղացումը Բախմուտում և այնտեղ ուժեր են տեղակայել։ Վկայակոչելով հայտնի ռազմական բլոգերին՝ ISW-ն գրում է, որ չորս գումարտակ է տեղակայվել Բախմուտի մերձակայքում՝ կանխելու ուկրաինական ճեղքումները։ Ուկրաինայի պաշտպանության փոխնախարար Աննա Մալյարը նախօրեին նույնպես հայտարարել էր լրացուցիչ ստորաբաժանումների տեղափոխման մասին՝ նա խոսել էր օդադեսանտային ուժերի մասին:
Ինտիտուտի գնահատմամբ՝ Ուկրաինան Բախմուտի շրջանում ավելի սահմանափակ գործողություներ է անցկացնում՝ ռուսական ուժերի համեմատ, որոնք կենտրոնացնում են ուժերը քաղաքի գրավման համար։
Մալյարը հայտնել էր, որ ուկրաինացի զինվորականներին հաջողվել է ազատագրել Բախմուտի մոտ 20 կմ, իսկ Ուկրաինայի Զինված ուժերի ցամաքային զորքերի հրամանատար Ալեքսանդր Սիրսկին հայտարարել է, որ Ուկրաինան շարունակում է օգտագործել «ակտիվ պաշտպանության» հայեցակարգը, որը ենթադրում է հակահարձակումներ Բախմուտի մոտ։
ISW-ն պարզել է մայիսի 16-ին հրապարակված Բախմուտի հարավ-արևմուտքում ուկրաինական դիրքերի աշխարհագրությունը և գտել հաստատում, որ ուկրաինական ուժերը հենց քաղաքում հասել են սահմանափակ հաջողությունների, ինչպես նաև փոքր նվաճումներ Բախմուտից հյուսիս-արևմուտք:
Նոր ստորաբաժանումների ժամանումը վկայում է, որ Ռուսաստանը շարունակում է Բախմուտում հարձակողական ուժեր կենտրոնացնել։ Փորձագետները կարծում են, որ դա կարող է լինել Ռուսաստանի մտահոգությունների պատասխանը առաջնագծի կայունության վերաբերյալ՝ այդ շրջանում «Վագներ» խմբավորման շարունակական դեգրադացիայի պայմաններում:
Բացի այդ, զեկույցի հեղինակները նշում են, որ ուժեղացումները պետք է օգնեն «Վագներին» գրավել Բախմուտի մնացյալ մասը և ցուցադրել մարտավարական հաղթանակ՝ ուկրաինական հակահարձակման օպերացիայի դեպքում հնարավոր հետագա անհաջողություններից առաջ։
Էմմա Չոբանյան
