Շոլցը կոչ է արել կամուրջները չայրել «մեկ այլ Ռուսաստանի» հետ, որը դեմ է պուտինյան ռեժիմին

Եվրախորհրդի գագաթնաժողովում Գերմանիայի կանցլեր Օլաֆ Շոլցը կարծիք է հայտնել որ, կամուրջները պետք է չայրել «մյուս Ռուսաստանի» հետ, որը դեմ է նախագահ Վլադիմիր Պուտինին և նրա կառավարությանը, գրում է DW-ի ռուսական ծառայությունը:

Ըստ Գերմանիայի ղեկավարի՝ ինչ-որ պահի Ռուսաստանի պատերազմն Ուկրաինայի դեմ կավարտվի։  «Մի բան հաստատ է՝ սա չի ավարտվի պուտինյան իմպերիալիզմի հաղթանակով»,- ասել է Օլաֆ Շոլցը։ Նրա խոսքով` Ուկրաինան աջակցություն կստանա այնքան ժամանակ, քանի դեռ չի հասել արդար խաղաղության։

«Մինչ այդ մենք՝ Եվրոպայի խորհուրդը, պետք է կամուրջներ պահպանենք մեկ այլ Ռուսաստանի, մեկ այլ Բելառուսի ներկայացուցիչների հետ և այդպիսով պահպանենք երկու երկրների համար ժողովրդավարական, խաղաղ ապագայի հնարավորությունը, որքան էլ դա մեզ այսօր անհավանական թվա»,- ընդգծել է Շոլցը։

Միաժամանակ նա կոչ է արել հետևողականորեն պատժել Ուկրաինայում ռազմական հանցագործությունների պատասխանատուներին։ Դրան, ըստ Շոլցի, պետք է նպաստի ԵԽ գագաթնաժողովի շրջանակներում ստեղծված Ուկրաինային պատճառված կորուստների միջազգային ռեգիստրը։

Հիշեցնենք՝ մայիսի 16-ին Իսլանդիայի մայրաքաղաք Ռեյկյավիկում մեկնարկել է Եվրոպայի խորհրդի (ԵԽ) անդամ 46 երկրների ղեկավարների չորրորդ գագաթնաժողովը, որին մասնակցում է նաև ՀՀ վարչապետ Նիկոլ Փաշինյանը։ Հանդիպման հիմնական նպատակն է քննարկել իրավիճակը, որը ստեղծվել է մայրցամաքում Ուկրաինայի դեմ ռուսական ագրեսիայի արդյունքում։

Գագաթնաժողովի շրջանակներում արդեն հայտարարվել է ռուսական ագրեսիայի հետևանքով Ուկրաինայի կորուստների ռեգիստր ստեղծելու մասին, բացի այդ, Մեծ Բրիտանիան և Նիդեռլանդները պայմանավորվել են ստեղծել կոալիցիա՝ Կիևի համար F-16 գնելու համար։
Գագաթնաժողովին տեսակապի միջոցով մասնակցել է նաև Ուկրաինայի նախագահ Վլադիմիր Զելենսկին։ Նա Եվրախորհրդի երկրներին կոչ է արել Ուկրաինային լրացուցիչ հակաօդային պաշտպանության համակարգեր և հրթիռներ մատակարարել։

Երկիրը պետք է ուժեղացնի իր հակաօդային պաշտպանությունը, մասնավորապես՝ արևմտյան կործանիչների օգնությամբ, ընդգծել է Զելենսկին՝ հայտարարելով, որ մայիսի 16-ի գիշերը Ուկրաինայի հակաօդային պաշտպանությունը խոցել է Ռուսաստանի կողմից արձակված հրթիռների 100 տոկոսը։