07.10.2026 | 23:48
Արթուր Դանիելյանը կալանավորվեց
Թուրքիայի ընտրություններում քվեարկության ժամկետն ԱՄՆ-ում և Կանադայում կրճատվել է, որտեղ Քըլըչդարօղլուն 80% ձայն է հավաքել
Քաղաքականություն
16.05.2023 | 16:09
ԱՄՆ-ում և Կանադայում բնակվող Թուրքիայի քաղաքացիների համար նախագահական ընտրությունների երկրորդ փուլի քվեարկության ժամանակացույցը, որտեղ ընդդիմության միասնական թեկնածու Քեմալ Քըլըչդարօղլուն հավաքել էր տպավորիչ՝ 80 տոկոս ձայն, կրճատվել է՝ չորս օրից հասնելով երկու օրվա, գրում է Gercek news-ը։
Մայիսի 14-ի ընտրությունների համար Բարձրագույն ընտրական հանձնաժողովի կողմից հրապարակված արտասահմանյան քվեարկության վայրերի ցանկում նշվում էր, որ եթե ընտրություններն անցնեն երկրորդ փուլ, ապա մայիսի 20-ից 24-ը, Նյու Յորքի հյուպատոսությունից բացի, քվեատուփեր կտեղադրվեն նաև այլ ներկայացուցչություններում՝ Լոնգ Այլենդում և Հարավային Ջերսիում։
Սակայն Վաշինգտոնում ԱՄՆ դեսպանատունը հայտարարել է, որ ընտրությունների երկրորդ փուլում քվեատուփերը հասանելի կլինեն միայն մայիսի 20-21-ը, ինչն առաջացրել է հանրության դժգոհությունը։
ԱՄՆ-ում Թուրքիայի դեսպան Մուրադ Մերջանը Թվիթերում անդրադարձել է հանրության մտահոգություններին։
«Հարգելի՛ քաղաքացիներ, ընտրությունների վերաբերյալ բոլոր որոշումները կայացնում է Բարձրագույն ընտրական խորհուրդը: Արտասահմանյան առաքելությունները կատարում են որոշումները: Այս խորհրդի գործունեությունը և բողոքարկումը նույնպես բաց են»,- նշել է նա։
Նման հայտարարությամբ է հանդես եկել նաև Օտտավայում Թուրքիայի դեսպանությունը՝ նշելով, որ YSK-ի որոշմամբ՝ Կանադայում քվեարկությունը տեղի կունենա միայն մայիսի 20-21-ը։ Կանադայի համար տրամադրված նախնական տեղեկության մեջ նույնպես նշվել է մայիսի 20-24-ը։ Եվրոպական երկրների համար նման կարգավորումների մասին չի հայտարարվել։
Հավելենք, որ ոչ պաշտոնական տվյալներով՝ մայիսի 14-ին ԱՄՆ-ում կայացած նախագահական ընտրություններին քվեարկել է 51.000 մարդ, որից 80,38 տոկոսը՝ Քըլըչդարօղլուի օգտին։ Իսկ Կանադայում 21,589 ընտրողներից էլ Քըլըչդարօղլուի օգտին քվեարկել է 79,65 տոկոսը։
Էմմա Չոբանյան
