07.10.2026 | 23:48
Արթուր Դանիելյանը կալանավորվեց
Բաքուն դժգոհել է ՀՀ-ում ԵՄ դեսպանի հայտարարություններից՝ մեղադրելով Ադրբեջանի «ներքին գործերին խառնվելու մեջ»
Քաղաքականություն
16.05.2023 | 14:46
Պաշտոնական Բաքվին դուր չեն եկել Հայաստանում ԵՄ պատվիրակության ղեկավար, դեսպան Անդրեա Վիկտորինի՝Արցախի հայերի իրավունքների և անվտանգության ապահովման ու դրա համար միջազգային մեխանիզմի ստեղծման մասին նախօրեին արված հայտարարությունները։
Ադրբեջանի ԱԳՆ խոսնակ Այխան Հաջիզադեն հայտարարել է, որ «Ադրբեջանի նեքին գործերին խառնվելու՝ ԵՄ-ի փորձերն անընդունելի են»։
«Եվրամիության դեսպանի այս հայտարարությունները, որոնք միջազգային իրավունքի նորմերին և սկզբունքներին հակառակ՝ Ադրբեջանի ներքին գործերին միջամտելու փորձ են, անընդունելի են։ Ոչ ոք չպետք է միջամտի հայ բնակիչների հետ երկխոսության ադրբեջանական կողմի ջանքերին, պետք է վերջ տրվի մեր տարածքային ամբողջականության և ինքնիշխանության դեմ ուղղված հայտարարություններին»,- հայտարարել է Հաջիզադեն։
Բաքվի արձագանքն ուշագրավ է նրանով, որ մայիսի 14-ի Բրյուսելում հենց Ադրբեջանի նախագահ Իլհամ Ալիևն է Արցախի հայության իրավունքների և անվտանգության ապահովման հարցերը քննարկել ԵՄ Խորհրդի նախագահ Շառլ Միշելի ու ՀՀ վարչապետ Նիկոլ Փաշինյանի հետ եռակողմ հանդիպմանը։
Մասնավորապես, հանդիպումից հետո Միշելը հայտարարել էր, որ շարունակվել են բանակցությունները «նախկին Լեռնային Ղարաբաղի ինքնավար մարզում բնակվող հայերի իրավունքների և անվտանգության հարցերի շուրջ»՝ նշելով, որ խրախուսել է Ադրբեջանին ներգրավվել դրական օրակարգի մշակման գործում՝ նպատակ ունենալով երաշխավորել բնակչության իրավունքներն ու անվտանգությունը՝ միջազգային հանրության հետ սերտ համագործակցությամբ։
Էմմա Չոբանյան
