Զելենսկին ավարտել է շրջագայությունն Արևմտյան Եվրոպայում

Ուկրաինան կստանա ավելի շատ զենք, քաղաքական աջակցություն և պաշտպանություն ժողովրդի համար, գրում է Euronews-ը։
Վլադիմիր Զելենսկին իր շրջագայությունը Արևմտյան Եվրոպայով ավարտել է Շեկերսում՝ Մեծ Բրիտանիայի վարչապետ Ռիշի Սունակի պաշտոնական նստավայրում։ Ուկրաինայի նախագահը ավելի շատ ռազմական օգնություն է խնդրել Լոնդոնից, Փարիզից, Բեռլինից և Հռոմից, և նրա խոսքով՝ ստացել է այն:

«3 երկար օր, և մեր մարտիկները, մեր պետությունն ավելի հզոր են դառնում։ Համոզված եմ՝ շատ ավելի ուժեղ։ Տուն ենք վերադառնում պաշտպանական նոր փաթեթով՝ ավելի շատ նոր, հզոր զենք ռազմաճակատի համար, ավելի շատ պաշտպանություն մեր մարդկանց համար։ Ավելի շատ քաղաքական աջակցություն»,- հայտարարել է Զելենսկին։

Էմանուել Մակրոնը հաստատել է, որ Ֆրանսիան կշարունակի աջակցել Ուկրաինային ՌԴ հետ հակամարտությունում։

«Մենք վճռել ենք նոր սպառազինություն մատակարարել։ Մենք նաև որոշել ենք երկրի արևելքում ուկրաինացիների հետ միասին ստեղծել միավորումներ զորքերի պատրաստման, գումարտակների պատրաստման համար, որոնք կառաջնորդեն հակահարձակումը և դիմադրությունը, ինչպես նաև՝ տեխնիկա, հրազեն վերանորոգելու համար, քանի որ Ուկրաինան նաև դրա կարիքն ունի»,-հայտարարել է Ֆրանսիայի նախագահը:

Սպիտակ տան ազգային անվտանգության խոսնակը զգուշացրել է, որ Իրանն ու Ռուսաստանն ընդլայնում են իրենց պաշտպանական գործընկերությունը։ Նրա խոսքով՝ Թեհրանը շարունակում է մնալ Կրեմլի գլխավոր ռազմական մատակարարը։