Ադրբեջանի ԱԳՆ-ն բրյուսելյան հանդիպումը «օգտակար ու արդյունքի միտված» է գնահատել

Ադրբեջանի ԱԳ նախարարությունը հայտարարություն է տարածել նախօրեին Բրյուսելում Եվրոպական խորհրդի նախագահ Շառլ Միշելի միջնորդությամբ կայացած  Փաշինյան-Ալիևի  եռակողմ բանակցությունների վերաբերյալ՝ հանդիպումը գնահատելով «օգտակար ու արդյունքի միտված երկու երկրների միջև հարաբերությունների կարգավորման տեսակետից»։

Ուշագրավ է, որ այս անգամ Ադրբեջանի արտաքին գերատեսչության հայտարարության մեջ չի ասվում, որ բանակցություններն ընթացել են բացառապես Ադրբեջանի շահերին համապատասխան, ինչպես նախկինում եղել է։

«Հանդիպման ընթացքում մտքերի հանգամանալից փոխանակում է տեղի ունեցել Ադրբեջանի և Հայաստանի միջև երկկողմ խաղաղության համաձայնագրի նախագծի համաձայնեցման, սահմանների սահմանազատման և հաղորդակցության վերականգնման ոլորտներում կոնկրետ արդյունքների հասնելու համար»,-ասվում է հաղորդագրության մեջ։

Բաքուն նշում է, որ ադրբեջանական կողմի սկզբունքային դիրքորոշումն է «պետությունների տարածքային ամբողջականության հարգումը, Հայաստանի կողմից այս համատեքստում միջազգային մակարդակով ճանաչված Ադրբեջանի տարածքային ամբողջականության ընդունումը»։ Ի դեպ, չի նշվում, արդյոք՞ Ադրբեջանը ճանաչում է Հայաստանի տարածքային ամբողջականությունը։

«Հայտարարում ենք, որ Ադրբեջանի և Հայաստանի միջև հարաբերությունների կարգավորումը փոխադարձ ճանաչման և միմյանց ինքնիշխանության, տարածքային ամբողջականության և միջազգային սահմանների հարգման հիման վրա տարածաշրջանում կայուն խաղաղություն և կայունություն ապահովելու միակ ճանապարհն է»,-ասվում է հայտարարության մեջ։

Էմմա Չոբանյան