04.11.2024 | 23:04
Ադրբեջանի ՊՆ ղեկավարը Սլովակիայում ռազմատեխնիկական համագործակցության հարցեր է քննարկել
ՄԱԿ-ը Մալիի բանակին և «անհայտ սպիտակամորթ զինվորականների» մեղադրում է մեկ գյուղում 500 մարդու ոչնչացնելու մեջ․ «Վագների» մասին չի հիշատակվում
Քաղաքականություն
12.05.2023 | 23:15
ՄԱԿ-ը հայտնել է, որ Մալիի բանակի զինվորներն ու անհայտ օտարերկրյա զինվորականներ անցյալ տարվա մարտին աֆրիկյան այս երկրի կենտրոնում գտնվող Մուրա գյուղում առանց դատավարության սպանել են առնվազն 500 մարդու։ Մալիական խունտան ավելի վաղ հավաստիացրել էր, որ Մուրայում սպանվել են ջիհադիստ զինյալներ, գրում է BBC-ի ռուսական ծառայությունը։
ՄԱԿ-ի Մարդու իրավունքների գերագույն հանձնակատարի գրասենյակի կողմից այսօր հրապարակված զեկույցում ասվում է, որ ՄԱԿ-ն ամիսներ տևած հետաքննությունից հետո «խելամիտ հիմքեր ունի ենթադրելու», որ 2022 թվականի մարտի 27-31-ին Մուրայի իրադարձություններում, «խախտելով Միջազգային իրավունքի նորմերը, չափանիշները, կանոնները և/կամ սկզբունքներ սպանվել է առնվազն 500 մարդ։
Սպանվածներից մի քանիսին նախապես խոշտանգել են։
ՄԱԿ-ի փորձագետները բացահայտել են առնվազն 238 զոհի ինքնությունը։ Սպանվածների մեծ մասը տղամարդիկ են՝ զոհերի թվում մոտ 20 կին և յոթ երեխա կա։
Բացի այդ, ՄԱԿ-ի տվյալներով՝ բռնաբարվել է 58 կին ու աղջիկ։
«Զինված հակամարտությունների ընթացքում արտադատական մահապատիժները, բռնաբարությունները և խոշտանգումները ռազմական հանցագործություններ են և, կախված հանգամանքներից, կարող են նաև որակվել որպես մարդկության դեմ հանցագործություն»,- այս առնչությամբ ասել է ՄԱԿ-ի Մարդու իրավունքների գերագույն հանձնակատար Ֆոլկեր Թյուրքը։
Ովքե՞ր են եղել այդ սպիտակամորթ օտարերկրացիները, որոնք մասնակցել են Մուրայում տեղի ունեցած ջարդերին, զեկույցում ուղղակիորեն չի նշվում։ Դրանում մեջբերվում է տեղացիների վկայությունները, որոնք միայն ասել են, որ նրանք սպիտակամորթ տղամարդիկ են եղել, ովքեր խոսել են անծանոթ լեզվով, որից կարելի է եզրակացնել, որ այդ լեզուն ո՛չ ֆրանսերեն է, ո՛չ էլ անգլերեն:
«Վագների» ռուս վարձկանները Մալիում գործում են 2021 թվականից՝ նույն թվականին իշխանության եկած ռազմական խունտայի հետ ոչ պաշտոնական համաձայնագրով։ Վագներականների հայտնվելու պատճառով Մալիից հեռացել են արևմտյան խաղաղապահները, որոնք նախկինում օգնում էին երկրի իշխանություններին պայքարել արմատական իսլամիստների զինված խմբավորումների դեմ։
Ո՛չ Մալիի իշխանությունները, ո՛չ էլ «Վագները» դեռ չեն մեկնաբանել ՄԱԿ-ի փորձագետների եզրակացությունները։ Մինչ այժմ նրանք վստահեցնում էին, որ ռուս վարձկանները Մալիում ներկա են միայն որպես ռազմական հրահանգիչներ։
Տաթև Ֆռանգյան
