08.10.2026 | 12:17
Աշխարհի ու Եվրոպայի չեմպիոն Դավիդ Սիլվան 40 տարեկանում վերսկել է կարիերան
Դժվար է հավատալ, որ Էրդողանը հանգիստ կհեռանա․ Reuters
Քաղաքականություն
12.05.2023 | 19:21
Դժվար է հավատալ, թե Թուրքիայի նախագահ Ռեջեփ Թայիփ Էրդողանը կընդունի իր պարտությունն ու հանգիստ կլքի պաշտոնը։ Այս մասին ասվում է Reuters-ի վերլուծության մեջ, որը ներկայացնում է Gercek news-ը։
«Դժվար է հավատալ, որ մոլեգնած քաղաքական գործիչը, որը կառավարել է Թուրքիան հզոր բազուկով, բարեհաճորեն կընդունի պարտությունը և հանգիստ կհեռանա պաշտոնից»,- ասվում է հոդվածում:
Նշվում է, որ անորոշություն, անհանգստություն, ակնկալիք և լարվածություն կա, թե ընտրություններն ինչ արդյունքներ կարող են ունենալ Եվրոպայի երկրորդ ամենամեծ՝ 85 միլիոնանոց երկրի համար։
Ըստ հոդվածագրի՝ «նրանք, որոնք հետևել են Էրդողանի վերելքին վերջին երեք տասնամյակների ընթացքում, պնդում են, որ նա ամեն կերպ պայքարելու է իշխանությունը պահպանելու համար, և որ նա կարող է օգտագործել պետական ռեսուրսները ի շահ իրեն՝ չնչին հաղթանակ կորզելու կամ ցանկացած նեղ պարտություն վիճարկելու համար։
«Նա կվիճարկի արդյունքները, եթե դրանք իր օգտին չլինեն՝ տարբերությունը փոքր լինի, բայց նա շատ բան չի կարող անել, եթե ընդդիմությունը ջախջախիչ հաղթանակ տանի: Նա գտնվում է իր քաղաքական կարիերայի ամենաթույլ կետում»,-լրատվամիջոցը մեջբերում է լրագրող Կադրի Գյուրսելին։
Էրդողանի կողմից արդյունքների հնարավոր վիճարկման վերաբերյալ մեկնաբանության խնդրանքին՝ Թուրքիայի նախագահականի պաշտոնյան Reuters-ին ասել է, որ խախտումների դեպքում կդիմեն ընտրական խորհուրդ։
«Բայց եթե ընտրություններում պարտվի, «նա չի լքի պաշտոնը» ասելը բոլորովին անիմաստ և անհիմն է»,- ասել է նա։
Հավելենք, որ Թուրքիայի համապետական ընտրությունները տեղի են ունենալու մայիսի 14-ին։
Էմմա Չոբանյան
