14.08.2026 | 23:22
Հուլիսին Ուկրաինայում զոհվել է առնվազն 437 խաղաղ բնակիչ՝ ամենաբարձր ցուցանիշը 2022-ից ի վեր. ՄԱԿ
Պակիստանի դատարանը 2 շաբաթով ազատ է արձակել նախկին վարչապետ Իմրան Խանին
Քաղաքականություն
12.05.2023 | 17:36
Պակիստանի նախկին վարչապետ Իմրան Խանը գրավի դիմաց ազատ է արձակվել՝ Իսլամաբադի Գերագույն դատարանի կողմից կալանքի ժամկետը երկու շաբաթով հետաձգելուց հետո, գրում է Euronews-ը։
«Իմրան Խանի՝ իր «Ալ-Քադիր Թրասթ» հիմնադրամի գործով գրավի դիմաց ազատ արձակելու խնդրանքը բավարարվել է»,- հաղորդում են տեղական լրատվամիջոցները։
Նախօրեին Գերագույն դատարանը Խանի ձերբակալությունն անօրինական է ճանաչել և հրամայել նրան ազատել կալանքից։
Նախկին վարչապետը, սակայն, տուն վերադառնալու թույլտվություն չի ստացել։ Նրան հանձնարարվել է գնալ դատարանի մոտ գտնվող հյուրանոց և գիշերել այնտեղ, որպեսզի հաջորդ օրը կրկին ներկայանա դատարան։
Խանը ձերբակալվել է մայիսի 9-ին՝ մայիսի 1-ին տրված կալանքի որոշմամբ: Նա մեղադրվում է կոռուպցիայի և «Ալ-Քադիր Թրասթ»-ը փողերի լվացման համար օգտագործելու մեջ։ Քննիչների տվյալներով՝ վարչապետության տարիներին քաղաքական գործիչն օրինականացրել է մոտ 175,5 միլիոն դոլար, որը ստացել է Մեծ Բրիտանիայից ոմն անշարժ գույքի ընկերությունից։
Խանի կալանավորումը զանգվածային բողոքի ցույցեր է առաջացրել երկրի մի շարք խոշոր քաղաքներում, այդ թվում՝ մայրաքաղաքում: Ցուցարարներն անգամ հարձակվել են երկրի վարչապետի նստավայրի վրա։
Տաթև Ֆռանգյան
