«Մենք չենք դիմել «Եվրատեսիլ»-ին, թող ցույց տան գրավոր դիմումը»․ Զելենսկու խոսնակի հերքումը

BBC-ի ուկրաինական ծառայությունն Ուկրաինայի նախագահի մամուլի քարտուղար Սերգեյ Նիկիֆորովին խնդրել է պարզաբանել՝ արդյո՞ք Զելենսկին դիմել է «Եվրատեսիլ»-ին՝ մրցույթի ընթացքում ելույթ ունենալու խնդրանքով, ինչը, ըստ արևմտյան լրատվամիջոցների, մերժվել է։

Նիկիֆորովն ավելի վաղ Facebook-ում գրել էր, որ Ուկրաինայի նախագահի աշխատակազմը «Եվրատեսիլ»-ի կազմակերպիչներին չի դիմել Զելենսկու՝ մրցույթի եզրափակիչ կամ որևէ այլ փուլում ելույթ ունենալու առաջարկով։

«Այստեղ հարց է առաջանում կազմակերպիչներին, թե ո՞վ է նրանց կոնտակտային անձը և ո՞վ կարող էր դիմել։ Կրկնում եմ, որ ուկրաինական կողմը և նախագահի աշխատակազմը պաշտոնապես նման խնդրանք չեն ներկայացրել»,- BBC-ին ասել է Նիկիֆորովը։

Նրա խոսքով՝ «Եվրատեսիլ»-ի կազմակերպիչները պետք է տան այն մարդու անունը, ով, ըստ իրենց վարկածի, դիմել է իրենց, և եթե այդպիսին կա, ցույց տան գրավոր դիմումը։

Ուկրաինայի նախագահի աշխատակազմում BBC-ի ուկրաինական ծառայության զրուցակիցներից մեկը չի բացառել, որ մրցույթի ուկրաինական պատվիրակությունից որևէ մեկը կարող էր խոսել Զելենսկու ուղերձի հիպոթետիկ հնարավորության մասին, և կազմակերպիչները դա ընդունել են որպես պաշտոնական խնդրանք։

Հիշեցնենք, որ ավելի վաղ «Եվրատեսիլ 2023» միջազգային երաժշտական մրցույթի կազմակերպիչները հայտարարել էին, որ մերժել են Ուկրաինայի նախագահ Վլադիմիր Զելենսկիին տեսաուղերձով ելույթ ունենալ երաժշտական մրցույթի եզրափակիչի ժամանակ և կոչ անել 160 միլիոն հանդիսատեսին՝ աջակցել Կիևին ռուսական ագրեսիայի դեմ։

Տաթև Ֆռանգյան