16.12.2025 | 12:12
ՖԻՖԱ․ Տարվա լավագույն ֆուտբոլիստի մրցանակի հավակնորդները
ԱՄՆ-ը չեղարկել է օտարերկրացիների համար կորոնավիրուսի դեմ պատվաստման պահանջը
Քաղաքականություն
12.05.2023 | 14:51
Մայիսի 12-ին ԱՄՆ-ը հանել է օդային ճանապարհով երկիր ժամանող օտարերկրյա քաղաքացիների համար կորոնավիրուսի դեմ պարտադիր պատվաստման պահանջը, գրում է DW-ի ռուսական ծառայությունը։
«Մենք հայտարարում ենք, որ վարչակազմը մայիսի 11-ից հետո կդադարեցնի դաշնային աշխատակիցների, դաշնային գերատեսչությունների և միջազգային օդային ճանապարհորդների համար COVID-19-ի պատվաստման պարտադիր պահանջը»,- ասվում է Սպիտակ տան հայտարարության մեջ։
2021 թվականի նոյեմբերից ԱՄՆ իշխանությունները երկիր մուտք գործող օտարերկրացիներից պահանջել են ներկայացնել COVID-19-ի դեմ ամբողջական պատվաստումների ապացույցներ։ Ընդ որում, ընդունվել են միայն ԱՄՆ բժշկական կարգավորող մարմնի կամ Առողջապահության համաշխարհային կազմակերպության (ԱՀԿ) կողմից հաստատված պատվաստանյութերով պատվաստումների վկայականները։
Մայիսի 11-ին Միացյալ Նահանգներում պաշտոնապես ավարտվեց առողջապահության ոլորտում արտակարգ դրությունը՝ պայմանավորված կորոնավիրուսային համաճարակի հետ։
Հիշեցնենք նաև, որ մայիսի 5-ին Առողջապահության համաշխարհային կազմակերպությունը հայտարարեց, որ COVID-19-ն այլևս միջազգային առողջապահական արտակարգ իրավիճակի պատճառ չէ։ Այնուամենայնիվ, ԱՀԿ անդամ երկրներին խորհուրդ է տրվում մինչև 2025 թվականի վերջը շարունակել հետևել կորոնավիրուսի դեմ պայքարի ոլորտում ժամանակավոր հրահանգներին։
Տաթև Ֆռանգյան
