ԱՄՆ-ը Բաքվին կոչ է անում ազատ արձակել բանտում երեք ամիս հացադուլում գտնվող ընդդիմադիր գործչին ու կամայականորեն ձերբակալվածներին

Ադրբեջանի ընդդիմադիր գործիչ, Ժողովրդական ճակատ կուսակցության անդամ Ալիզամին Սալաևն արդեն երեք ամսից ավելի հացադուլում է՝ ի նշան իր ապօրինի կալանավորման։ Նախօրեին էլ Գարադաղի շրջանային դատարանում տեղի է ունեցել Սալաևի դատավարությունը։ Նա կրկին հայտարարել է իր անմեղության մասին՝ հերքելով զոհի վրա դանակով հարձակվելու մեղադրանքը։ Ընդդիմությունը կարծում է, որ Սալաևին առաջադրված մեղադրանքները շինծու են, որպեսզի պատժեն նրան ընդդիմադիր գործունեության համար։

Սալաևի գործով դատավարությանն ուշադրությամբ հետևում է ԱՄՆ-ը՝ Ադրբեջանի իշխանություններին կոչ անելով ազատ արձակել նրան։

«Մենք տեղյակ ենք հաղորդումներին, որ Ալիզամին Սալաևը հացադուլ է հայտարարել, մենք շարունակում ենք ուշադիր հետևել նրա գործին: Միացյալ Նահանգները շարունակում է հավատարիմ մնալ մարդու իրավունքների և հիմնարար ազատությունների հարգանքը խթանելուն: Մենք իշխանություններին կոչ ենք անում քայլեր ձեռնարկել՝ իր իսկ Սահմանադրությամբ և միջազգային համաձայնագրերով Ադրբեջանի ստանձնած պարտավորություններին համապատասխան՝ պաշտպանելու իր քաղաքացիների իրավունքները»,- ադրբեջանական Թուրան գործակալությանն ասել է Բաքվում ԱՄՆ դեսպանատան ներկայացուցիչը։

Նա նաև հավելել է, որ «ԱՄՆ-ը կրկնում է իր կոչը Ադրբեջանի իշխանություններին՝ ազատ արձակել բոլոր անձանց, որոնք անարդարցիորեն կամ կամայականորեն ձերբակալվել են իրենց իրավունքների և հիմնարար ազատությունների իրականացման համար»։

Էմմա Չոբանյան