Ինչ է պատահել Լուկաշենկոյին․ Բելառուսի նախագահը, ըստ լրատվամիջոցների, վատառողջ է

Բելառուսական լրատվամիջոցներում և սոցիալական ցանցերում թիվ մեկ քննարկման թեման Ալեքսանդր Լուկաշենկոյի առողջական վիճակն է. մայիսի 9-ին Մոսկվայում և Մինսկում տեղի ունեցած հանդիսավոր միջոցառումների ժամանակ նա անառողջ տեսք ուներ, գրում է BBC-ի ռուսական ծառայությունը։

Բելառուսական լրատվամիջոցներն ուշադրություն են հրավիրել այն փաստի վրա, որ Մոսկվայի շքերթում Լուկաշենկոն հյուծված տեսք ուներ, Կարմիր հրապարակում  չկարողանալով 300 մետր քայլել՝ ստիպված էր էլեկտրական մեքենա օգտագործել։ Նրա թևին վիրակապ էր նկատվում, որը սովորաբար դնում են կաթիլայինից հետո։ Բացի այդ, Լուկաշենկոն Վլադիմիր Պուտինի և Մոսկվա ժամանած մյուս նախագահների հետ  չի մասնակցել  ոչ պաշտոնական նախաճաշին։

Երեկոյան նա ժամանել է Մինսկ և, հակառակ ավանդույթի, ելույթ չի ունեցել  մայիսի 9-ի  հանդիսավոր արարողությանը։ Լուկաշենկոյի փոխարեն և նրա անունից ելույթ է ունեցել պաշտպանության նախարար Վիկտոր Խրենինը։ Մայիսի 9-ից հետո Լուկաշենկոն չի երևացել հանրության առաջ։ Նրա առողջական վիճակի մասին պաշտոնական տեղեկություն չկա։ Վլադիմիր Պուտինի մամուլի քարտուղար Դմիտրի Պեսկովը հայտարարել էր, որ Լուկաշենկոն «որքան հնարավոր է շուտ պետք է հեռանար Մոսկվայից՝ Բելառուսում տոնական միջոցառումների մասնակցելու համար, իսկ նրա առողջական վիճակի մասին քննարկումները «չափազանց կոռեկտ չեն»:

«Զերկալո» հրատարակությունը հաշվարկել է, որ վերջին 10 տարիների ընթացքում Լուկաշենկոն և նրա ներկայացուցիչները միայն չորս անգամ են խոսել նրա առողջական վիճակի մասին։ 2013 և 2014 թվականներին նա ծնկների վիրահատության է ենթարկվել (կամ մեկ ծնկի երկու վիրահատության), իսկ 2020 թվականին նա ինքն է ասել, որ երկու անգամ առանց ախտանշանների կորոնավիրուսով է հիվանդացել։

Բելառուսի ընդդիմության առաջնորդ Սվյատլանա Տիխանովսկայան հայտարարություն է արել, որում ասվում է, որ եթե «Լուկաշենկոն վերջ», ապա Բելառուսը պարտավոր է կանխել «մեկ այլ բռնապետի կամ ռուս հովանավորյալի» ժամանումը, և նա պատրաստ է պատասխանատվություն ստանձնել դա թույլ չտալու համար։

Բելառուսի օրենսդրության համաձայն, եթե Ալեքսանդր Լուկաշենկոն մահանա կամ հրաժարական տա առողջական պատճառներով, նրա տեղը կզբաղեցնի Բելառուսի Ազգային ժողովի (խորհրդարանի) նախագահը։ Այժմ այս պաշտոնը զբաղեցնում է Նատալյա Կոչանովան։ Նա ստիպված կլինի երկրում արտահերթ նախագահական ընտրություններ հայտարարել։