15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Տարբեր ուղղություններով խփում էին․ Սոթքի դիրքերի ուղղությամբ սադրանքին հայկական ԶՈՒ-ն արժանի հակահարված է հասցրել․ ՏԵՍԱՆՅՈՒԹ
Քաղաքականություն
11.05.2023 | 19:50
«Ժամը 10-ին արդեն խփեցին սարերին, փոշի-դուման դուրս եկավ, ես դուրս եկա ֆռռացի, մտածեցի՝ երկինքն է, Էդ ժամանակ սկսվեց, դադարեց ու առավոտը հինգից սկսվեց»։ Վաղ առավոտից սկսված ադրբեջանական ռազմական սադրանքն այսպես է նկարագրում Սոթքի բնակչուհին։ Factor TV-ի հետ զրույցում նշում է՝ կրակոցներ և հրետանու աշխատանքի ձայներ դեռ երեկ երեկոյան ժամը 22:00-ից սկսած է լսել, դրանք ինտենսիվ են դարձել լուսաբացին։
Գեղարքունիքի մարզի Սոթք գյուղի դիրքերի ուղղությամբ ադրբեջանական կողմը հրետանային և ականանետային միջոցներ է կիրառել, հայկական ԶՈՒ-ն արժանի հակահարված է տվել։
Ադրբեջանական սադրանքից հետո Հայաստանի Պաշտպանության նախարարությունը հայտնում է չորս վիրավորի մասին, ադրբեջանական կողմը պաշտոնապես հայտնել է մեկ զոհի և մեկ վիրավորի մասին։ Վիրավոր հայ զինվորականների կյանքին վտանգ չի սպառնում։
Այսօր ամբողջ օրվա ընթացքում Պաշտպանության նախարարության մամուլի խոսնակ Արամ Թորոսյանն ինտենսիվորեն տեղեկացնում էր սահմանային իրավիճակի մասին։
Ադրբեջանի գործողություններն այսօր կառավարության նիստի ընթացքում Նիկոլ Փաշինյանը որակեց սադրիչ՝ ընդգծելով, որ Բաքուն նպատակ ունի զրոյացնել այն առաջընթացը, որը գրանցվել է այս ամսվա սկզբին Վաշինգտոնում տեղի ունեցած բանակցությունների ընթացքում։ Ընդ որում՝ Ադրբեջանը հերթական ռազմական սադրանքը նախորդում է ընդամենը 3 օրից Բրյուսելում սպասվող Փաշինյան-Միշել-Ալիև եռակողմ հանդիպմանը։
Փաշինյանն այսօր հայտարարեց, որ երկու հանդիպումներն էլ այս միջադեպից հետո հայկական կողմը չի չեղարկում, իսկ ահա Ադրբեջանի ԱԳ նախարարությունը հայտնում է, որ Բաքուն համաձայնություն է տվել միայն բրյուսելյան հանդիպմանը, իսկ հունիսի 1-ին Ֆրանսիայի ու Գերմանիայի ղեկավարների մասնակցությամբ բանակցությունների հետ կապված վերջնական որոշում չունեն։
ԱԺ «Պատիվ ունեմ» խմբակցության քարտուղար Տիգրան Աբրահամյանի գնահատմամբ՝ ադրբեջանական կողմը ցանկանում է հասնել Սոթքի ոսկու հանքի աշխատանքների դադարեցմանը և հանքի նկատմամբ վերահսկողություն հաստատելուն։ Աբրահամյանի խոսքով՝ չնայած առաջիկայում նախատեսված են բանակցություններ, Ալիևը չի պատրաստվում խաղաղության գնալ։
Իրավիճակի կայունացման մասին տեղեկություններ ՊՆ-ն հրապարակեց օրվա երկրորդ կեսին։ Սակայն Սոթքի բնակիչներից ոմանք անվտանգության նկատառումներով գյուղից ժամանակավորապես հեռացել են։
Գեղարքունիքի մարզպետ Կարեն Սարգսյանը, մինչդեռ, այս տեղեկությունների վերաբերյալ հայտնում է․ «Որևէ բնակիչ, որ գնահատի՝ բնակիչների մեծ մասը դուրս է եկել, դա իրականությանը չի համապատասխանում, ես խոսում եմ Սոթք գյուղից»։
Տեղեկություններ կան նաև, որ այսօր ռազմական ոստիկանությունը փակել է Սոթք գյուղ տանող ճանապարհը՝ թույլ չտալով լրագրողներին աշխատել գյուղում։
Մանրամասները՝ տեսանյութում։
Նարեկ Կիրակոսյան
