14.08.2026 | 23:22
Հուլիսին Ուկրաինայում զոհվել է առնվազն 437 խաղաղ բնակիչ՝ ամենաբարձր ցուցանիշը 2022-ից ի վեր. ՄԱԿ
ԵՄ դիտորդները լուրջ գլխացավանք են Ադրբեջանի և ՌԴ-ի համար․այս սադրանքը պայմանավորված գործողություն է․ Էդգար Վարդանյան․ ՏԵՍԱՆՅՈՒԹ
Քաղաքականություն
11.05.2023 | 19:32
Ի՞նչ նպատակով Ադրբեջանը հերթական ռազմական հարձակումը գործեց Հայաստանի վրա, հատկապես, երբ կա բանակցային պրոցես՝ մայիսի 14-ին հանդիպումներ են սպասվում Բրյուսելում, մայիսի 19-ին՝ Մոսկվայում և հունիսի 1-ին՝ Մոլդովայում հնգակողմ հանդիպում՝ Միշել-Ալիև-Փաշինյան-Մակրոն-Շոլց։
Հատկանշական է նաև, որ թե՛ Տեղ գյուղի մոտ Ադրբեջանի արյունալի սադրանքը, թե՛ այսօր վաղ առավոտյան Սոթքում Բաքվի հարձակումները համընկել են Ադրբեջանի և Ռուսաստանի կողմից ԵՄ դիտորդներից դժգոհություն հայտնելու փաստի հետ։ Բառացիորեն երեկ է ՌԴ ԱԳՆ խոսնակ Զախարովան «հակաարդյունավետ» որակել ՀԱՊԿ-ի հրապարակային քննադատությունը ՀՀ-ի կողմից։
«Տարակուսանք է առաջացնում ՀՀ ղեկավարության ցանկությունը՝ քննարկել կազմակերպության արդյունավետության հարցերը ՀԱՊԿ-ից դուրս, այն դեպքում, երբ ՀԱՊԿ-ում կան անհրաժեշտ բոլոր ձևաչափերն ու փոխգործակցության հաստատված խողովակները։ Հայ գործընկերներից ակնկալում ենք նախաձեռնողական քայլեր՝ վերսկսելու բովանդակային աշխատանքը Հայաստանում ՀԱՊԿ առաքելության տեղակայման և մեր դաշնակցին օգնելու այլ համատեղ միջոցառումների վերաբերյալ»,- ասել է նա։
Քաղաքագետ Էդգար Վարդանյանը Factor TV-ին տված հարցազրույցում պնդում է, որ Ադրբեջանն այս սադրանքով ճնշում է Հայաստանին՝ իր դիրքերը բարելավելով առաջիկա բանակցություններից առաջ․ «Այսինքն՝ սա ուղղված է ՀՀ-ին թուլացնելուն։ ԵՄ դիտորդները լուրջ գլխացավանք են Ադրբեջանի և ՌԴ-ի համար․ այս սադրանքները պայմանավորված գործողություն են, մենք տեսնում ենք, որ Զախարովան ՀԱՊԿ դիտորդների տեղակայում է պնդում»։
Ադրբեջանի ռազմական սադրանքին արձագանքել է պաշտոնական Կրեմլը, բայց ոչ թե դատապարտելով կամ գնահատական տալով Ադրբեջանի սադրանքներին, այլ ասել է, որ ՌԴ-ն կողմերից զուսպ մոտեցում է ակնկալում և կոչ է անում չձեռնարկել որևէ գործողություն, որը կարող է հանգեցնել լարվածության աճի:
Ինչո՞ւ է Հայաստանի ռազմավարական դաշնակիցը հավասարության նշան դնում Ադրբեջանի հետ և կոչ անում մեզ զսպվել, երբ Ադրբեջանն է ագրեսորը։
«Մենք տեսանք, որ ՌԴ-ն չդատապարտեց Ադրբեջանի սադրանքը, և կոչ արեց կողմերին զսպվել։ Սա տարօրինակ չէ, քանի որ Բաքուն է իր դաշնակիցը, ոչ թե ՀՀ-ն։ Չդատապարտելով Ադրբեջանի այս սադրանքը՝ ՌԴ-ն սիրաշահում է նրան․ սա այն գինն է, որ վճարում է՝ մնալու դիմաց։ Եվ կարող ենք մտածել, որ Ադրբեջանն այս սադրանքին չէր գնա, եթե ՌԴ-ի աջակցությունը չունենար։ Այսօր կոնֆլիկտ մենեջմենթով է զբաղված Կրեմլը»,- նշեց քաղաքագետը։
Հարցազրույցն ամբողջությամբ՝ տեսանյութում։
Ռոբերտ Անանյան
