Մեծ Բրիտանիան հաստատել է Կիևին մինչև 250 կմ հեռահարությամբ Storm Shadow հրթիռների մատակարարումը

Մեծ Բրիտանիայի պաշտպանության նախարար Բեն Ուոլեսը հաստատել է Կիևին Storm Shadow թևավոր հրթիռների փոխանցումը, որոնք նոր ներուժ են Ուկրաինայի համար՝ ավելի մեծ հեռահարության հարվածներ հասցնելու։ Այսօր ելույթ ունենալով Մեծ Բրիտանիայի Համայնքների պալատում՝ Ուոլեսն այդ քայլն անվանել է կշռադատված և համաչափ պատասխան Ռուսաստանի կողմից իրականացվող էսկալացիային, գրում է BBC-ի ռուսական ծառայությունը։

Հինգշաբթի ավելի վաղ CNN-ը, հղում անելով իր աղբյուրներին, հայտնել էր, որ Մեծ Բրիտանիան արդեն մի քանի Storm Shadow հրթիռներ է մատակարարել Ուկրաինային՝ ուշադրություն հրավիրելով այն փաստի վրա, որ այդ հրթիռների հեռահարությունը թույլ է տալիս խորը հարվածներ հասցնել Ուկրաինայի օկուպացված շրջանների տարածքին և 2014 թվականին բռնակցված Ղրիմին։

Մինչ այդ էլ, Բրիտանիան դարձել էր առաջին երկիրը, որը համաձայնել էր Ուկրաինային փոխանցել հիմնական մարտական տանկերը։

«Storm Shadow հրթիռների կիրառումը Ուկրաինային թույլ կտա հետ մղել ռուսական ուժերը Ուկրաինայի ինքնիշխան տարածքից։ Մենք պարզապես չենք կանգնի մի կողմ, քանի դեռ Ռուսաստանը սպանում է խաղաղ բնակիչներին։ Ռուսաստանը պետք է ընդունի, որ միայն իր գործողությունները հանգեցրին այն բանին, որ նման համակարգեր են տրամադրվել Ուկրաինային»,- ասել է Ուոլեսը։

Storm Shadow-ն ավիացիոն թևավոր հրթիռ է, որը մշակվել է Միացյալ Թագավորության և Ֆրանսիայի կողմից: Խոցման հեռահարությունն ավելի քան 250 կմ է, ինչը զգալիորեն գերազանցում է այն հրթիռների շառավիղը, որ մինչ այժմ մատակարարել են Ուկրաինայի արևմտյան գործընկերները։

Տաթև Ֆռանգյան