Էսկալացիա Գազայում. Իսրայելը երկրորդ օրն է՝ հարվածներ է հասցնում զինյալների դիրքերին, նրանք պատասխանում են հրթիռակոծությամբ

Գազայի հատվածից պաղեստինցի զինյալները հրթիռներ են արձակել Իսրայելի ուղղությամբ՝ ի պատասխան արդեն երկրորդ օրը շարունակվող «Իսլամական ջիհադ» խմբավորման դիրքերի և թիրախների ուղղությամբ իսրայելական օդային հարվածների, գրում է BBC-ի ռուսական ծառայությունը։

Իսրայելի իշխանությունները հայտնում են, որ հրթիռների մեծ մասը որսացել են, իսկ զոհերի մասին տեղեկություններ չկան:
Իսրայելի ռազմաօդային ուժերը երկրորդ օրն անընդմեջ հարվածներ են հասցրել Գազայի հատվածում գտնվող «Իսլամական ջիհադի» թիրախներին։ Զինվորականները հայտնել են, որ հարվածներ են հասցրել այն վայրերին, որտեղից, ըստ իսրայելական բանակի, զինյալները հրթիռներ են արձակում Իսրայելի ուղղությամբ:

Պայթյուններ են լսվել տարբեր կետերում, այդ թվում՝ Գազայի հատվածի հյուսիսային մասում, որտեղ ականատեսները պատմում են, որ կա «Իսլամական ջիհադի» ուսումնական ճամբար։

AFP-ի լրագրողն արձանագրել է ավիահարվածները Գազա քաղաքից հյուսիս, խիտ բնակեցված տարածքից ծուխ է դուրս եկել:

Իսրայելական զինվորականները հայտնել են նաև, որ կրակ են բացել պաղեստինցի գրոհայինների ուղղությամբ, որոնք շարժվում էին դեպի Գազայի հարավային Խան Յունիս քաղաքի հրթիռների արձակման վայր:

Հարձակումների հետևանքով զոհվել է առնվազն մեկ մարդ, ևս մեկը վիրավորվել է, AFP-ին հայտնել է Գազայի Առողջապահության նախարարության ներկայացուցիչը:

Նախօրեին Իսրայելի ՌՕՈՒ պաշտպանության ուժերը մի շարք հարվածներ են հասցրել ՀԱՄԱՍ-ի կողմից վերահսկվող Գազայի հատվածի թիրախներին: Արդյունքում սպանվել են «Իսլամական ջիհադ» խմբավորման երեք դաշտային հրամանատարներ։ Պաղեստինյան կողմի տվյալներով՝ նրանց հետ մահացել են նաև նրանց ընտանիքների առնվազն 12 անդամներ։

Իսրայելը հայտարարել է, որ գործողություն է սկսել գրոհայինների դեմ, որոնք անմիջական վտանգ են ներկայացնում իր քաղաքացիների և երկրի անվտանգության համար:

Տաթև Ֆռանգյան