07.10.2026 | 23:48
Արթուր Դանիելյանը կալանավորվեց
Թուրքիան ՌԴ-ի հետ պայմանավորվել է 600 մլն դոլարի գազի վճարումների հետաձգման շուրջ․ Reuters
Քաղաքականություն
10.05.2023 | 17:36
Թուրքիան հետաձգել է Ռուսաստանին բնական գազի 600 միլիոն դոլարի վճարումը մինչև 2024 թվականը: Reuters-ին այս մասին հայտնել են խնդրին ծանոթ երկու աղբյուրներ։ Նշենք, որ առաջին նման հետաձգումն է անցյալ շաբաթ հայտարարված գործարքի շրջանակում, որն ընդգծում է Անկարայի և Մոսկվայի միջև կապերի խորացումը:
Ըստ համաձայնագրի՝ Թուրքիայի՝ մինչև 4 միլիարդ դոլար արժողությամբ վճարումները Ռուսաստանին կարող են հետաձգվել մինչև հաջորդ տարի, երկու աղբյուրներն էլ անանունության պայմանով հայտնել են լրատվամիջոցին։ Համաձայնության այլ մանրամասներ չեն բացահայտվում։
Թուրքիան, որը պատրաստվում է կիրակի կայանալիք նախագահական և խորհրդարանական ընտրություններին, մեծապես կախված է էներգակիրների ներկրումից, և Ռուսաստանը նրա ամենամեծ մատակարարն է։ Գազի դիմաց վճարման գործարքը որոշակի նվազեցնում է ճնշումը Թուրքիայի արտաքին պաշարների վրա, որոնք սպառվել են լիրային աջակցելու արտասովոր տնտեսական քաղաքականության պատճառով։
«Պաշտոնապես 600 միլիոն դոլարի վճարումը հետաձգվել է մինչև հաջորդ տարի, դրա վրա մեծ ազդեցություն է թողել էներգակիրների գների բարձրացումը»,- ասել է իրազեկ աղբյուրներից մեկը։
Ռուսաստանի և Թուրքիայի Էներգետիկայի նախարարությունները և երկրների էներգետիկ ընկերությունները՝ «Գազպրոմը» և «Բոտաշը», չեն պատասխանել հարցի վերաբերյալ մեկնաբանությունների խնդրանքներին:
Հավելենք, որ Թուրքիայի էներգետիկայի նախարար Ֆաթիհ Դյոնմեզն օրերս հայտարարել էր, որ Անկարայի և Մոսկվայի միջև համաձայնություն է ձեռք բերվել Թուրքիայի կողմից ՌԴ-ից ներկրվող բնական գազի վճարումների հետաձգման վերաբերյալ։ Նա նույնպես մանրամասներ չէր հայտնել։
Էմմա Չոբանյան
