Ուկրաինայի ԱԳՆ ղեկավարը Արևմուտքին հորդորել է մեծ հույսեր չկապել Ուկրաինայի ԶՈւ հակահարձակման հետ

Ուկրաինայի արտաքին գործերի նախարար Դմիտրի Կուլեբան, հետևելով երկրի պաշտպանության նախարարության ղեկավար Ալեքսի Ռեզնիկովին, Արևմուտքին հորդորել է չափազանց մեծ հույս չկապել Ուկրաինայի զինված ուժերի հակահարձակման հետ, գրում է DW-ի ռուսական ծառայությունը։

«Այդ գրոհին որպես վերջինը մի վերաբերվեք, քանի որ մենք չգիտենք, թե ինչով այն կավարտվի։ Եթե մենք այդ հակահարձակման ընթացքում կարողանանք ազատագրել մեր տարածքները, դուք արդյունքում կասեք․ այո՛, այն վերջինն էր։ Սակայն եթե ոչ, դա կնշանակի, որ մենք պետք է պատրաստվենք հաջորդ հակագրոհին»,- ընդգծել է Կուլեբան Bild թերթին տված հարցազրույցում։

Մայիսի 6-ին ամերիկյան The Washington Times թերթը գրել էր ուկրաինական ղեկավարության մտավախությունների մասին, որ Ուկրաինայի զինված ուժերի հակահարձակման արդյունքը չի արդարացնի դրա հետ կապված սպասումները։ «Մեր հակահարձակողական արշավից ակնկալիքներն աշխարհում գերագնահատված են», – թերթը մեջբերել էր  Ուկրաինայի պաշտպանության նախարար Ալեքսեյ Ռեզնիկովին։ «Մարդկանց մեծ մասն ինչ-որ մեծ բանի է սպասում»,- ասել էր նա WP-ին տված հարցազրույցում՝ հավելելով, որ այս ֆոնի վրա գործողության արդյունքը կարող է հանգեցնել «էմոցիոնալ հիասթափության»։

Ռուսաստանի հետ խաղաղ բանակցությունների հեռանկարի վերաբերյալ Կուլեբան  ասել էր. «Մարդկանց պետք է հիշեցնել, որ մենք համբերատար բանակցել ենք Ռուսաստանի հետ 2014-2022 թվականներին: Համբերատարությամբ: Այս բանակցությունների առաջին մասն անցկացվել է Գերմանիայի և Ֆրանսիայի աջակցությամբ: Եվ մեզ խորհուրդ էին տալիս զիջումների գնալ այստեղ, այնտեղ, արդյո՞ք ստացվեց, ո՛չ, մենք նպաստեցինք Երկրորդ համաշխարհային պատերազմից հետո Եվրոպայի ամենամեծ պատերազմին»:

«Եթե նա իրական խաղաղություն ցանկանար, չէր սկսի այս պատերազմը: Սա այն չարիքը չէ, որի հետ կարելի է բանակցել», – ասել է Կուլեբան։