Ֆրանսիայի խորհրդարանը «Վագները» ճանաչել է ահաբեկչական կազմակերպություն

Ռուսական «Վագներ» մասնավոր ռազմական խմբավորումը Ֆրանսիայում ներառվել է ահաբեկչական կազմակերպությունների ցուցակում։ Բանաձևին կողմ են քվեարկել Ազգային ժողովի պատգամավորները, գրում է currenttime.tv-ին։  Փաստաթուղթը պարունակում է գերմանական հետախուզական ծառայությունների գնահատականները, որոնց համաձայն  «Վագներ» խումբը «մասնակցել է Բուչայում խաղաղ բնակիչների սպանություններին ու խոշտանգումներին»։ Ընդգծվում է, որ Ուկրաինայում խմբի գործողությունները կարող են որակվել որպես ռազմական հանցագործություններ։

Ֆրանսիացի պատգամավորների  ընդունած փաստաթղթում նշվում է նաև Սիրիայում, Մալիում ու Կենտրոնական Աֆրիկյան Հանրապետությունում խաղաղ բնակչության նկատմամբ ռուսական խմբավորման կողմից բազմաթիվ ոտնձգությունների մասին։ Պատգամավորները դիմում են կառավարությանը՝ «հրավիրելով դիվանագիտական ​​համագործակցության Եվրամիության հետ՝ «Վագներ» մասնավոր ռազմական ընկերությունը ահաբեկչական կազմակերպությունների՝ Եվրամիության ցուցակում ներառելու համար։

Բացի այդ, Ֆրանսիայի խորհրդարանը կոչ է արել «ավելի արդյունավետ աջակցություն ցուցաբերել ահաբեկչության զոհերին, որպեսզի տուժածները կարողանան արդարադատություն ստանալ, իսկ անհրաժեշտության դեպքում՝ փոխհատուցում»:

Հիշեցնենք, որ  մարտին էլ Լիտվայի Սեյմն էր «Վագները» ճանաչել ահաբեկչական կազմակերպություն։ Մեծ Բրիտանիան ևս մտադիր է խմբավորումը ներառել  ահաբեկչական կազմակերպությունների ցանկում։ The Times-ի հաղորդմամբ՝ բրիտանական խորհրդարանը բանաձևը կարող է ընդունել առաջիկա շաբաթների ընթացքում։

Էմմա Չոբանյան