06.08.2026 | 17:06
Ռուսաստանի հավաքականի նախկին ֆուտբոլիստը որակազրկվել է դոպինգի համար
Նիդեռլանդները բանակցություններ է վարում Ուկրաինային F-16-երի մատակարարման շուրջ
Քաղաքականություն
09.05.2023 | 23:06
Նիդեռլանդները, Դանիան և Մեծ Բրիտանիան բանակցում են Ուկրաինային F-16 կործանիչների հնարավոր մատակարարման շուրջ։ Այս մասին հայտնել է Նիդեռլանդների վարչապետ Մարկ Ռյուտեն Բրազիլիա այցի առաջին օրը, փոխանցում է BBC-ի ռուսական ծառայությունը։
Այն մասին, որ նման բանակցություններ են ընթանում, անցյալ շաբաթ հայտարարել էր նաև Դանիայի վարչապետ Մատտե Ֆրեդերիկսենը։
Ռյուտեի խոսքով՝ քննարկմանը ներգրավված են նաև Եվրամիության և Վաշինգտոնի որոշ կառույցներ։ Նիդեռլանդների վարչապետը հասկացրել է, որ լավատես է բանակցությունների արդյունքների վերաբերյալ՝ հիշեցնելով, որ հաուբիցների և տանկերի հարցը նույնպես քննարկում էր պահանջում, սակայն արդյունքում համաձայնեցվեց։
Այցի ընթացքում Ռյուտեն մտադիր է տարհամոզել Բրազիլիայի կառավարությանը՝ Լուիս Ինասիո Լուլա դա Սիլվայի գլխավորությամբ, որը մինչ այժմ քննադատում էր Արևմուտքին Ուկրաինային ռազմական օգնություն տրամադրելու համար։
Մարկ Ռյուտեի խոսքով՝ այս պատերազմում Ուկրաինայի հաջողությունից է կախված ամբողջ Եվրոպայի ապագան։
«Մենք պետք է օգնենք Ուկրաինային այս պայքարում: Եթե Պուտինը հաջողության հասնի Ուկրաինայում, իսկ ես չեմ կարծում, որ դա տեղի կունենա, նա դրանով կանգ չի առնի: Ամստերդամում, Բեռլինում, Փարիզում և ամբողջ Եվրոպայում մարդիկ անհանգստացած են իրենց անվտանգության համար»,- ասել է Ռյուտեն։
Տաթև Ֆռանգյան
