«Թուրքական ճանապարհն» անցնում է Ղարաբաղով․ Չավուշօղլուն Բաքվին «պաշտպանել» է Քըլըչդարօղլուից

Նախընտրական քարոզարշավն ագրեսիվ հռետորաբանությամբ շարունակող Թուրքիայի ԱԳ նախարար Մևլութ Չավուշօղլուն այս անգամ էլ որոշել է Ադբեջանին պաշտպանել ընդդիմության նախագահի միասնական թեկնածու Քեմալ Քըլըչդարօղլուից։ Այսօր Չավուշօղլուն Անթալիայի Արհեստավորների պալատի միության միջոցառմանն ունեցած ելույթում անդրադարձել է Քըլըչդարօղլուի ներկայացրած «թուրքական ճանապարհին»։

«Այն քաղաքականությունը, որին Թուրքիան այսօր հետևում է, բանականության ճանապարհն է, ողջախոհության ճանապարհը, խաղաղության ճանապարհը, Ղրիմի թաթարներին և մեսխեթցի թուրք ազգականներին պաշտպանելու ճանապարհն է։ Թուրքական ճանապարհն անցնում է միջին միջանցքով։ Թուրքական ճանապարն անցնում է Զանգեզուրով, Ղարաբաղով։ Պարոն Քըլըչդարօղլուն ներկայացրել է Ադրբեջանը շրջանցող քարտեզ։ Եթե շրջանցեք Ադրբեջանը, ստիպեք մեր բեռնատարներին սպասել սահմաններին մի քանի օր, այդ ճանապարհի վերջը թեքությունն է լինելու։ Եղբա՛յր, Ադրբեջանից ի՞նչ ես ուզում»,- հայտարարել է Չավուշօղլուն։

Նա նշել է, որ Ժողովրդահանրապետական կուսակցությունը, որի հիմնադիրը Մուսթաֆա Քեմալ Աթաթուրքն է, ստեղծման պատմությունից ի վեր «խնդիրներ ունի ադրբեջանցի եղբայրների հետ»։

«Կա Ադրբեջան, Թուրքմենստան, շրջանցում եք նրանց, լրիվ ուրիշ երթուղի է։ Ո՞ւմ եք ծառայում: Ո՞վ է ձեզ տվել այս քարտեզը, ո՞վ է խաբել։ Նրանք ձգտում են կառավարել երկիրը։ Նման բան չի լինի»,- ասել է Թուրքիայի ԱԳ նախարարը։

Հավելենք, որ ավելի վաղ Քեմալ Քըլըչդարօղլուն սոցցանցերի իր էջերում տեսանյութ էր հրապարակել՝ «Ո՛չ արևմուտք, ո՛չ արևելք, սա թուրքական ճանապարհն է» վերնագրով։ Նա նշել էր, որ պատմական մետաքսի ճանապարհը վերաբացվելու է, և հայտարարել, որ այն կդառնա Ասիայի և Եվրոպայի միջև կարևորագույն առևտրային ուղիներից մեկը՝ 5,500 կմ երկարությամբ երկաթուղային կապով։

«Այս նախագիծը դեպի ծով ելք չունեցող Թուրքմենստանը, Ուզբեկստանը և Ղազախստանը կմիացնի թուրքական նավահանգիստներին։ Թուրքիան կդառնա թյուրքական աշխարհի ծովային դարպասը»,- ասել էր Քըլըչդարօղլուն։

Այս նախագիծն առաջացրել է Բաքվի զայրույթը, քանի որ դրանում Ադրբեջանը ներառված չէ։ Սա է՛լ ավելի է բորբոքել Ադրբեջանի իշխանությունների կողմից Թուրքիայի ընդդիմության դեմ իրականացվող արշավը։

Հավելենք, որ Թուրքիայում նախընտրական արշավի մեկնարկից ի վեր ադրբեջանական ամբողջ պետական քարոզչությունը, ինչպես նաև Թուրքիայում գործող Բաքվի կողմից ֆինանսավորվող լրատվամիջոցները լծված են Ռեջեփ Թայիփ Էրդողանի քարոզարշավը սատարելու գործին։ Այս արշավին միացել է նաև անձամբ Ադրբեջանի նախագահ Իլհամ Ալիևը, որն ապրիլի 29-ին մեկնել էր Անկարա և հայտնել ընտրություններում Էրդողանին իր աջակցության մասին։ Սրա հետևանքով թուրքական հասարակությունում առկա է դժգոհություն, որ պաշտոնական Բաքուն խառնվում է Թուրքիայի ներքին գործերին։

Էմմա Չոբանյան