ՀՀ քաղաքական ղեկավարությունը չի այցելել Եռաբլուր

Այսօր մայիսի 9-ն է։ Հայ ժողովուրդն այսօր նշում է Շուշիի ազատագրման 31-ամյակը, Արցախի պաշտպանության բանակի կազմավորման տարեդարձը և Ֆաշիզմի դեմ տարած հաղթանակը։

Վաղ առավոտից քաղաքացիներն այցելում են «Եռաբլուր» զինվորական պանթեոն՝ հարգանքի տուրք մատուցելու արցախյան առաջին, քառօրյա, 44-օրյա պատերազմների և հետպատերազմական իրավիճակում սահմանային մարտերում զոհված տղաների հիշատակին։

Այսօր «Եռաբլուր» զինվորական պանթեոն չեն այցելել ՀՀ իշխանության բարձրաստիճան ներկայացուցիչները։ Factor.am-ն առավոտյան արձանագրել է, որ հայրենիքը պաշտպանելիս անմահացածների հիշատակը հավերժացնող հուշահամալիրի մոտ այդ պահի դրությամբ ծաղկեպսակներ չեն տեղադրվել ՀՀ վարչապետի, ՀՀ նախագահի և ԱԺ նախագահի անուններից։

Վարչապետ Նիկոլ Փաշինյանն աշխատանքային այցով Ռուսաստանի Դաշնությունում է՝ մասնակցում է Հայրենական պատերազմի հաղթանակի 78-ամյակի միջոցառումներին, սակայն նրա թիմակիցները ևս չէին եկել «Եռաբլուր»։ Նշենք, որ նրանք մասնակցում էին Մայր Հայաստանի հուշահամալիրում կազմակերպված միջոցառմանը։

Նկատենք, որ ՀՀ քաղաքական իշխանությունը ամենաբարձր մակարդակով այս օրը նախ այցելել է «Եռաբլուր», հետո նոր միայն մասնակցել Հայրենական պատերազմին նվիրված միջոցառումներին։

ՀՀ ԱԺ նախագահի աշխատակազմից Factor.am-ը հետաքրքրվեց, թե արդյո՞ք խորհրդարանի նախագահն այցելելու է «Եռաբլուր», կառույցից հայտնեցին, որ այց նախատեսված չէ։

Նշենք, որ երեկ «Եռաբլուր» զինվորական պանթեոն են այցելել ԵԿՄ նախագահ Սասուն  Միքայելյանը՝ ՔՊ-ական մի քանի պատգամավորների հետ։

Նարեկ Կիրակոսյան