19.02.2026 | 20:38
Կոնֆերենցիաների լիգա․ «Նոայի» մեկնարկային կազմը «ԱԶ Ալկմարի» դեմ խաղում
Հերոսաբար կռվելու և դատարկաձեռն մնալու գինը․ 1945-ի հաղթանակի հակառակ կողմը․ ՏԵՍԱՆՅՈՒԹ
Քաղաքականություն
09.05.2023 | 14:02
Այսօր մայիսի 9-ն է, և Հայաստանի վարչապետ Նիկոլ Փաշինյանը Ռուսաստանի նախագահ Վլադիմիր Պուտինի հրավերով Մոսկվայում է․ նա մասնակցում է Հայրենական մեծ պատերազմում հաղթանակին նվիրված միջոցառումներին: Ինչպե՞ս է ընկալվելու Հայաստանի մասնակցությունն այս միջոցառումներին, հատկապես՝ ռուս-ուկրաինական պատերազմի համատեքստում, արդյո՞ք Կրեմլն այս փաստը չի օգտագործի իր քարոզչական պայքարում։
Հասարակական, քաղաքական գործիչ Գարեգին Միսկարյանը վստահ է՝ սա Կրեմլի կողմից հերթական ձիով քայլն է Հայաստանի դիրքերը ժողովրդավար աշխարհում թուլացնելու և Ռուսաստանից կախվածությունն ուժեղացնելու համար։
«Որ կփորձեն ներքին լսարանի համար Նիկոլ Փաշինյանի այցը ներկայացնել որպես դաշնակից պետության աջակցություն՝ ռուս ժողովրդին ցույց տալու համար, որ իրենք մենակ չեն, և թեկուզ աշխարհն իրենց դեմ է, իրենք բարեկամներ ունեն, դա միանշանակ է»,- նշում է նա։
Բացի Փաշինյանից՝ Պուտինը Մոսկվա է հրավիրել նաև ԱՊՀ անդամ մյուս երկրների ղեկավարներին։ Գարեգին Միսկարյանի խոսքով՝ եթե Փաշինյանին հրավիրել են նաև հայ-ադրբեջանական հարաբերությունների կարգավորման հետ կապված հարցեր քննարկելու նպատակով, ապա վարչապետը կարող էր գնալ, ասենք, մայիսի 10-ին, բայց ո՛չ 9-ին։
Հայաստանը հսկայական ներդրում է ունեցել ֆաշիզմի դեմ տարած հաղթանակի գործում։ Երկրորդ աշխհարամարտի տարիներին ՀԽՍՀ-ից ռազմաճակատ է մեկնել 650 հազար մարդ, ունեցել ենք ավելի քան 300 հազար զոհ։ Արդյո՞ք պատմական այս իրողությունները վերագնահատելու և վերարժևորելու խնդիր չունենք։
«Հայ ժողովրդի մասնակցությունը պարտադրված էր այդ պատերազմում, մենք ատեինք ֆաշիստներին, չատեինք՝ ուրիշ ելք չենք ունեցել, այդ պատերազմին հայ ժողովուրդը շատ մեծ արյուն է տվել»,- ասում է գրող, կինոդրամատուրգ Վահրամ Մարտիրոսյանը։
Պատմաբան Տիգրան Զաքարյանն էլ այն համոզմանն է, որ «Հայրենական պատերազմ» կապակցությունը ռուսական պատմագրությունն է հորինել և հաջողությամբ անցկացրել է այդ թեզը, որը կիրառում ենք նաև մենք։
«Չենք կարող մոռանալ, որ ի տարբերություն գրեթե բոլոր այլ հաղթող ազգերի՝ Հայաստանը մեկ քառակուսի մետր հող չստացավ, թեև մեծացան Ռուսաստանը, Ուկրաինան, Բելառուսը։ Այս առումով պատերազմը մեզ համար կրկնակի ողբերգություն էր»,- իր հերթին նկատում է ռեժիսոր, քաղաքական գործիչ Տիգրան Խզմալյանը։
Մանրամասները՝ տեսանյութում։
Աննա Բաբաջանյան
