08.10.2026 | 12:30
Ուկրաինական ԱԹՍ-ները հարվածել են Ռյազանում «Յանդեքս»-ի տվյալների կենտրոնին և Բաշկորտոստանում նավթավերամշակման գործարանին
Ավելի քան 1,6 միլիոն թուրք ընտրողներ արտերկրում քվեարկել են Թուրքիայի նախագահական և խորհրդարանական ընտրություններում
Քաղաքականություն
08.05.2023 | 17:26
Արտերկրում բնակվող ավելի քան 1,6 միլիոն թուրք ընտրողներ արդեն իսկ քվեարկել են մայիսի 14-ին Թուրքիայում կայանալիք նախագահական և խորհրդարանական ընտրություններում, գրում է Gercek news-ը։
Ընտրողներն արտերկրում բացված ընտրատեղամասերում կարող են քվեարկել մինչև մայիսի 9-ը, իսկ ահա սահմանային անցակետերում՝ մինչև մայիսի 14-ի ժամը 17:00-ն:
Ըստ Թուրքիայի Բարձրագույն ընտրական հանձնաժողովի (YSK) տվյալների՝ մայիսի 7-ի դրությամբ՝ արտերկրում գտնվող դեսպանատներում և հյուպատոսություններում իր ձայնը տվել է 1,490,727 ընտրող, իսկ մաքսակետերում քվեարկել է 108,425 ընտրող։ Արտերկրում, ընդհանուր առմամբ, գրանցված է 3 մլն 416 հազար 98 ընտրող։
Որոշ երկրներում՝ ԱՄՆ-ում, Բելգիայում, Մեծ Բրիտանիայում քվեարկությունը փակվել է մայիսի 1-ին, իսկ մի շարք այլ երկրներում, այդ թվում՝ Չինաստանում, Ալժիրում, Սերբիայում, Լիբանանում և Թուրքմենստանում, ավարտվել է մայիսի 7-ին: Այլ երկրներում, ինչպիսիք են Ավստրիան, Դանիան, Ֆրանսիան և Գերմանիան, քվեարկությունը կշարունակվի մինչև մայիսի 9-ը:
Նշենք, որ եթե նախագահական ընտրությունների առաջին փուլում ոչ մի թեկնածու չհավաքի ձայների 50 տոկոսից ավելին, մայիսի 23-ին կանցկացվի երկրորդ փուլ։ Այդ դեպքում արտերկրի ընտրական կենտրոններում քվեարկությունը տեղի կունենա մայիսի 20-ից 24-ը։
Հավելենք, որ Թուրքիայում նախագահական և խորհրդարանական ընտրությունները տեղի կունենան մայիսի 14-ին։
Էմմա Չոբանյան
