Քաղաքականություն
08.05.2023 | 16:10
Առնվազն 9 մարդ է վիրավորվել է կիրակի՝ մայիսի 7-ին Թուրքիայի Էրզրում քաղաքում ընդդիմության հանրահավաքի մասնակիցների վրա անհայտ անձանց հարձակման հետևանքով։ Հանդիպմանը ելույթ ունեցած Ստամբուլի քաղաքապետ Էքրեմ Իմամօղլուն հայտնել է, որ ընդդիմության ներկայացուցիչների և հանրահավաքի մասնակիցների ուղղությամբ քարեր են նետվել, ինչի հետևանքով վնասվել է նաև կուսակցության ավտոբուսը, փոխանցում է DW-ի ռուսական ծառայությունը։
Էքրեմ Իմամօղլուն նշել է, որ միջադեպի համար պատասխանատու չի համարում Էրզրումի բնակիչներին, սակայն պատրաստվում է դատի տալ քաղաքի և համանուն նահանգի ղեկավարներին՝ անգործության և հարձակումը չկանխելու համար։
Սա բռնության առաջին լուրջ դեպքն է մայիսի 14-ին կայանալիք նախագահական ընտրություններին նախորդող ծայրահեղ թեժ նախընտրական քարոզարշավում։ Մեծ ժողովրդականություն վայելող Ստամբուլի քաղաքապետ Էքրեմ Իմամօղլուն ներկայացնում է ընդդիմադիր Ժողովրդական դաշինքը, որն առաջադրել է միասնական թեկնածու՝ Ժողովրդահանրապետական կուսակցության առաջնորդ Քեմալ Քըլըչդարօղլուին։
Նրա մրցակիցը՝ Թուրքիայի գործող նախագահ Ռեջեփ Թայիփ Էրդողանը նույն օրը ելույթ է ունեցել Ստամբուլում տեղի ունեցած հանրահավաքում, որին, ըստ պաշտոնական տվյալների, մասնակցել է 1,7 միլիոն մարդ։ Հանրահավաքի ժամանակ պետության ղեկավարը Քեմալ Քըլըչդարօղլուին անվանել է «հարբեցող» և մեղադրել «ահաբեկիչների հետ» համագործակցելու մեջ։
Տաթև Ֆռանգյան
