26.06.2026 | 23:30
Հունիսի 29-ին Հայաստանի մի շարք հասցեներում էլեկտրաէներգիայի անջատումներ կլինեն
Փաշինյանն ու Ալիևը կհանդիպեն Բրյուսելում․ Financial Times
Քաղաքականություն
08.05.2023 | 10:45
Ադրբեջանի և Հայաստանի ղեկավարները Բրյուսելում այս շաբաթվա վերջին կվերսկսեն խաղաղության բանակցությունները։ Այս մասին Financial Times-ին հայտնել են նախապատրաստական աշխատանքներից տեղյակ երեք պաշտոնյաներ։ Ըստ պարբերականի՝ Եվրոպական խորհրդի նախագահ Շառլ Միշելը կիրակի օրը կհյուրընկալի Ադրբեջանի նախագահ Իլհամ Ալիևին և Հայաստանի վարչապետ Նիկոլ Փաշինյանին։ Աղբյուրը նշում է, որ արևմտյան դաշնակիցները ակտիվացնում են միջնորդական ջանքերը՝ վերջին շրջանում վիճելի սահմանային հարցերի շուրջ լարվածության աճի ֆոնին:
Տեղեկացվում է, որ հունիսի 1-ին էլ Քիշնևում կայանալիք Եվրոպական Քաղաքական Համայնքի գագաթնաժողովի շրջանակում Փաշինյանը, Ալիևը և Միշելը կարող են հանդիպել Գերմանիայի կանցլեր Օլաֆ Շոլցի և Ֆրանսիայի նախագահ Էմանուել Մակրոնի հետ: Փաշինյանի աշխատակազմից չեն արձագանքել պարբերականի մեկնաբանության խնդրանքին։ Իսկ Ադրբեջանի նախագահի խորհրդական Հիքմեթ Հաջիևը Financial Times-ին ասել է, որ իր երկիրը դրական է վերաբերվում է Շառլ Միշելի միջնորդությանը, «քանի որ ԵՄ-ն թաքնված օրակարգ չունի»: Նա հավելել է, որ ԵՄ նախաձեռնած գործընթացի շրջանակներում մշակվել է բանակցությունների «հիմնական հայեցակարգերը» և դրանց կառուցվածքը։
Բանակցությունները, հավանաբար, կենտրոնացված կլինեն Ադրբեջանի վերջին որոշման վրա՝ Լաչինի միջանցքում անցակետ տեղադրելու մասին, որը Հայաստանն ու Լեռնային Ղարաբաղը կապող միակ ճանապարհն է: Կքննարկվեն նաև սահմանազատման, գերիների փոխանակման, հազարավոր ականները հեռացնելուն ուղղված ջանքերը։
