Ադրբեջանում ՌԴ դեսպանը հայտարարել է, թե ոչ ոքի չի հաջողվի սեպ խրել Բաքվի ու Մոսկվայի հարաբերություններում

«Ոչ ոք չի կարողանա սեպ խրել Ադրբեջանի և Ռուսաստանի բարիդրացիական հարաբերությունների մեջ և խոչընդոտել խոշոր տարածաշրջանային նախագծերի զարգացմանը»,- հայտարարել է «Մոսկվա-Բաքու՝ երկու մայրաքաղաքների երկխոսությունը» համաժողովում Բաքվում ՌԴ դեսպան Միխայիլ Բոչարնիկովը, գրում են ադրբեջանական լրատվամիջոցները։

«Կարծում եմ, որ ճիշտ ժամանակն ու տեղն է վստահություն հայտնելու, որ ոչ ոքի չի հաջողվի սեպ խրել մեր բարիդրացիական հարաբերությունների մեջ և կանխել խոշոր տարածաշրջանային նախագծերի զարգացումը, ինչպիսին է Հյուսիս-Հարավ միջազգային տրանսպորտային միջանցքը»,-ասել է դեսպանը։

Նա հիշեցրել է, որ մարտի 17-ին Ադրբեջանի և Ռուսաստանի Դաշնության փոխվարչապետերի մասնակցությամբ տեղի է ունեցել «Խանոբա» գերժամանակակից մաքսային սահմանային անցակետի հանդիսավոր բացումը, որը կօգնի մեծացնել բեռնափոխադրումների ծավալը։ Դեսպանը նաև հայտնել է, որ երկու երկրների միջև ապրանքաշրջանառությունը 2022թ-ին  հասել է 3,71 մլրդ դոլարի։

«Գաղտնիք չէ, որ մեր երկրների միջև տնտեսական համագործակցության դրական զարգացումները տեղի են ունենում Արևմուտքի աննախադեպ ճնշման ֆոնին, որը ստիպում է բարեկամ պետություններին միանալ հակառուսական պատժամիջոցներին և կրճատել առևտրատնտեսական համագործակցությունը Ռուսաստանի հետ»,- ասել է Բոչարնիկովը։

Նա նշել է, որ արևմտյան երկրները «հենց այնպես չեն  օգնություն  տրամադրում մաքսային ոլորտում», առաջին հերթին՝ ապրանքների տեղաշարժին հետևելու մաքսային առցանց գործիքների ներդրման համատեքստում։

«Նման օգնության նպատակն է փորձել ոչ միայն կանխել պատժամիջոցների տակ գտնվող ապրանքների հնարավոր վերաարտահանումը, այլև վերահսկողության տակ դնել Ռուսաստանի Դաշնությանը բարեկամ երկրների ողջ առևտրաշրջանառությունը»,- ասել  է ռուս դիվանագետը։

Բոչարնիկովը նաև հավելել է, որ ՌԴ-ն ու Ադրբեջանը հետագայում էլ «ամեն հնարավորն անելու են շարունակելու Հեյդար Ալիևի գիծը ՝ երկու երկրների հարաբերությունները դարձնելու ավելի լավ ու արդյունավետ»։