Բանակցությունների եզրափակիչ փուլն է․ վաշինգտոնյան օրակարգն ու ընդդիմության մտահոգությունը․ ՏԵՍԱՆՅՈՒԹ

ԱՄՆ-ը ողջունում է Հայաստանի և Ադրբեջանի բանակցություններում գրանցված առաջընթացը։ Վաշինգտոնում Միրզոյան-Բայրամով երկրորդ հանդիպումից հետո Թվիթերում գրել է ԱՄՆ նախագահի ազգային անվտանգության հարցերով խորհրդական Ջեյք Սալիվանը՝ առանց մանրամասնելու, թե կոնկրետ ինչ առաջընթացի մասին է խոսքը։ Հայաստանի և Ադրբեջանի արտգործնախարարները երեկ հանդիպել են հենց Սալիվանի մասնակցությամբ։

Արդեն մի քանի օր է՝ Միրզոյանն ու Բայրամովը Վաշինգտոնում են։ Արտգործնախարարների և Էնթոնի Բլինքենի մասնակցությամբ բանակցությունների եզրափակիչ փուլն այսօր երեկոյան է։ Մինչ այժմ, սակայն, Հայաստանի և Ադրբեջանի պաշտոնյաներն ընթացող բանակցություններից խոսում են շատ ընդհանրական։

Ազգային ժողովի արտաքին հարաբերությունների մշտական հանձնաժողովի նախագահը շեշտում է՝ Միրզոյան-Բայրամով-Սալիվան հանդիպմանը հայկական կողմը բարձրաձայնել է Հայաստանի ինքնիշխան տարածքից ադրբեջանական զորքերի դուրսբերման, ինչպես նաև սահմանազատման և սահմանագծման աշխատանքների անհրաժեշտության մասին։ Իսկ թե ինչ առաջընթացի մասին է խոսում Ջեյք Սալիվանը, իշխանական պատգամավորը հորդորում է սպասել բանակցողների վերադարձին։

Մինչ իշխանությունն առանց արցախցիների ինքնորոշման իրավունքը մատնանշելու խոսում է նրանց իրավունքներից և անվտանգությունից, ընդդիմադիր «Պատիվ ունեմ» խմբակցության պատգամավոր Թագուհի Թովմասյանն անընդունելի է համարում ցանկացած փաստաթղթի ստորագրում, որով Արցախը կմնա Ադրբեջանի կազմում։ Պատգամավորն ասում է՝ եթե անգամ հաջողվի միջազգային մեխանիզմների ներդրմամբ ձևավորվել Բաքու-Ստեփանակերտ երկխոսության հարթակ, միևնույն է, դա կնշանակի Արցախին Ադրբեջանի հետ միայնակ թողնել։

Ադրբեջանը, սակայն, մինչ այժմ մերժել է Բաքու-Ստեփանակերտ երկխոսություն միջազգային որևէ դերակատարի միջնորդությամբ։ Բաքուն դեմ է նաև երաշխավորի ինստիտուտի ներդրմանը, որի անհրաժեշտության մասին բարձրաձայնում է հայկական կողմը։ Իսկ հայկական տարածքները շարունակում են մնալ օկուպացված։ Այդուհանդերձ, այս հարցերի շուրջ հայկական կողմը շարունակելու է իր մոտեցումներն առաջ մղել՝ ասում է ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը։

Վաշինգտոնյան բանակցություններից ընդդիմադիրները մտահոգված են։ Ընդդիմադիր պատգամավոր Արթուր Խաչատրյանը  հայտարարում է՝ Հայաստանի բանակցողը երկրի շահը չի պաշտպանում։

Այսօր Հայաստանի և Ադրբեջանի պատվիրակությունների բանակցային վերջին օրն է։ Թե ինչ արդյունք կլինի մի քանի օր շարունակվող բանակցություններից, պարզ կդառնա ավելի ուշ։

Մանրամասները՝ տեսանյութում։

Շողիկ Գալստյան