16.05.2026 | 21:37
Փաշինյանը ներկայացրել է վարորդական իրավունքից զրկված անձանց խնդրի լուծման իր տարբերակը
ՌԴ փոխարտգործնախարարը պատմել է, թե Մոսկվան հայ-ադրբեջանական հարաբերությունների կարգավորման ինչ ուղղություններով է աշխատում
Քաղաքականություն
04.05.2023 | 18:51
Ռուսաստանի Դաշնության փոխարտգործնախարար Միխայիլ Գալուզինը «Իզվեստիային» տված հարցազրույցում անդրադարձել է ՀՀ-ի ու Ադրբեջանի միջև հարաբերությունններին ու ԼՂ հակամարտության կարգավորմանը։
Վերջինս հայտարարել է, որ առաջին հերթին ՌԴ նախագահ Վլադիմիր Պուտինի ջանքերի շնորհիվ էր, որ ժամանակին դադարեցվել է թեժ հակամարտությունը, նշել է, որ Ռուսաստանի, Ադրբեջանի և Հայաստանի ղեկավարների 2020 թվականի նոյեմբերի 9-ի հայտարարությունը հրադադարի, դեպի հայ-ադրբեջանական հարաբերությունների կարգավորում շարժվելու ու խաղաղապահ զորակազմի տեղակայման մասին է։
«Խոսքը երկխոսության ճանապարհով 4 հիմնական ուղղություններով ընթանալու մասին է՝ տարածաշրջանում տրանսպորտային ու տնտեսական կապերի ապաշրջափակումը, ՀՀ ու Ադրբեջանի միջև խաղաղության պայմանագրի կնքման նպատակով երկխոսությունը, երկու երկրների միջև սահմանների սահմանազատումը և խորհրդարանական ու հասարակական կապերի հաստատումը՝ առանց որոնց դժվար է խոսել երկկողմ հարաբերությունների լիակատար կարգավորման մասին»,-ասել է Գալուզինը։
Ըստ ՌԴ փոխարտգործնախարարի՝ կարգավորման հիմնական տարրերի ձևակերպումն ինքնին արդեն իսկ ձեռքբերում է։ «Կարգավորման հիմնական տարրերը՝ զինադադարը և հայ-ադրբեջանական հարաբերությունների կարգավորման շարժման առանցքային ուղղությունների ձևակերպումը, այս բոլոր սկզբունքները ձևակերպվեցին և սկսեցին իրագործվել բացառապես Ռուսաստանի և նրա նախագահի միջնորդական առաքելության շնորհիվ։ Սա ինքնին արդեն նշանակալի ձեռքբերում է։ Այս տարիների ընթացքում Ռուսաստանը փորձում է կոնկրետ գործնական ջանքեր գործադրել չորս ոլորտներում, որոնցից յուրաքանչյուրում ստեղծվել են լուրջ ներուժ և հետագա առաջընթացի հիմքեր։ Հասկանալի է, որ Լեռնային Ղարաբաղի հակամարտության պես հին և զգայուն կոնֆլիկտային իրավիճակների լուծումը չի կարող ընթանալ առանց դժվարությունների և «տեղում» առանց որևէ խնդիրների», – եզրափակել է Գալուզինը:
