15.08.2026 | 10:28
Վթարային ջրանջատում Կարճևան գյուղում
Ալիևը բողոքել է Մենենդեսի, Շերմանի ու Շիֆի աշխատանքից
Քաղաքականություն
04.05.2023 | 15:15
Ադրբեջանի նախագահ Իլհամ Ալիևը օկուպացված Շուշիում իր հոր՝ Հեյդար Ալիևի 100-ամյակին նվիրված համաժողովին, խոսելով ԱՄՆ-ի հետ հարաբերություններից, բողոքել է Կոնգրեսի հայկական հանձնախմբի անդամներից։ Ալիևը ԱՄՆ կոնգրեսականներին մեղադրել է «Ադրբեջանի դեմ ատելություն» տարածելու մեջ։
«Մենք հիասթափված ենք Ադրբեջանի վրա այնպիսի մարդկանց մշտական հարձակումներից, ինչպիսիք են սենատոր Մենենդեսը, որն ունի հայկական ընտանիք։ Նա խոշոր լոբբիստ է, ոչ թե հայկական, այլ հակաադրբեջանական։ Մենք ցավում ենք, որ Ադամ Շիֆի նման մարդը նույնպես ատելություն է սերմանում Ադրբեջանի նկատմամբ, և հիմա ուզում է բանաձև առաջ քաշել ԼՂ ճանաչման վերաբերյալ, այս բանաձևը, եթե ընդունվի, կունենա նույն նշանակությունը,ինչ Ֆրանսիայի Սենատի ու Ազգային ժողովի ընդունած բանաձևերը»,-ասել է Ալիևը՝ հավելելով, որ «գիտեն բոլոր այդ մարդկանց»։
«Մենք գիտենք, որ նրանց հովանավորում է հայկական լոբբին։ Մենք գիտենք, որ, ամենայն հավանականությամբ, ամեն ինչ այնքան էլ մաքուր չէ այս համագործակցության տակ։ Դա հնարավոր է, բայց այնպիսի մարդիկ, ինչպիսիք են Մենենդեսը, Շիֆը և Շերմանը, չպետք է խառնվեն մեր հարաբերություններին»,-ասել է Ալիևը մի քարոզչական շոուի ընթացքում, որի մասնակիցները հովանավորվում են հենց Ադրբեջանի իշխանությունների կողմից հակահայկական գործունեության համար։ Նրանցից մեկն, օրինակ, ամերիկացի հետազոտող Բրենդա Շաֆերն է, որը մասնագիտացած է միջազգային էներգետիկայի ոլորտում և ողջ կարիերան բացառապես Բաքվի կողմից ֆինանսական աջակցության հետ է կապված։
Էմմա Չոբանյան
