15.08.2026 | 11:44
Քաղաքական խորհրդակցություններ՝ Հայաստանի և Ռուանդայի ԱԳՆ-ների միջև
Ռուսական լրատվամիջոցները հայտնում են նավթավերամշակման գործարաններին ԱԹՍ-ների նոր հարվածների մասին
Քաղաքականություն
04.05.2023 | 13:00
Մայիսի 4-ի գիշերը Կրասնոդարի երկրամասում անօդաչու թռչող սարքը հարվածել է Իլսկի նավթավերամշակման գործարանի ջրամբարին, ինչի հետևանքով հրդեհ է բռնկվել, գրում է Meduza-ն։ Ըստ Ռիա Նովոստիի՝ չորս անօդաչու է հարձակվել գործարանի վրա՝ հարվածներ հասցնելով մեկ ժամ շարունակ։ Կրասնոդարի երկրամասի նահանգապետ Վենիամին Կոնդրատևը հայտարարել է, որ ոչ ոք չի տուժել։ Հրդեհը մարվել է առավոտյան ժամը հինգին մոտ։
Ռոստովի մարզի Կիսելևկա գյուղի Նովոշախտինսկի նավթային գործարանի վրա հարձակման մասին է հայտարարել շրջանի նահանգապետ Վասիլի Գոլուբևը։ Ըստ նրա՝ անօդաչուն հարվածել է գործարանի կառուցատարրերից մեկին, աշխատակիցները մարել են հրդեհը։ Տուժածների մասին տեղեկություններ չկան։
Վորոնեժի մարզի նահանգապետ Ալեքսանդր Գուսևն էլ հայտնել էր, որ մայիսի 4-ի առավոտյան հակաօդային պաշտպանության համակարգը երկնքում անօդաչու թռչող սարք է խոցել, զոհեր և ավերածություններ չկան։ Թե ինչ օբյեկտ է անօդաչուն գրոհել, նա չի ասել։ Իսկ ահա Astra տելեգրամ ալիքը պնդում է, որ տեղական ժամով 05:40-ին Բուտուրլինովկա քաղաքի 45117 զորամասի տարածքում անօդաչու թռչող սարք է ընկել և պայթել։
Անօդաչուների հարձակումների մասին հաղորդումները վերջինբ շրջանում հաճախակիացել են Ուկրաինայի կողմից նախապատրաստվող հակահարձակման տեղեկությունների ֆոնին։
Էմմա Չոբանյան
