22.01.2026 | 10:49
Հայաստանի հավաքականն ընկերական հանդիպում կանցկացնի Բելառուսի հետ․ աղբյուր
Հայաստանը կարող է մշտապես ակնկալել Վրաստանի աջակցությունը. Դավիթ Զալկալիանի
Քաղաքականություն
28.06.2018 | 18:33
Թբիլիսիում Հայաստանի դեսպան Ռուբեն Սադոյանը այսօր հանդիպել է Վրաստանի նորանշանակ արտգործնախարար Դավիթ Զալկալիանիի հետ:
Դեսպանատան մամուլի ծառայության հաղորդագրության համաձայն՝ Սադոյանը շնորհավորել է Զալկալիանիին եւ հույս հայտնել, որ նրա պաշտոնավարման ընթացքում հայ-վրացական բարեկամական հարաբերություններն առավել կխորանան։
Կողմերը քննարկել են երկկողմ հարաբերությունների օրակարգային հարցերի լայն շրջանակ, անդրադարձել, մասնավորապես, բարձր մակարդակի փոխայցելություններին, երկկողմ առեւտրատնտեսական հարաբերություններին, զբոսաշրջությանը:
Դեսպանն անդրադարձել է Հայաստան-Եվրամիության Համապարփակ եւ ընդլայնված գործընկերության համաձայնագրին եւ այն հնարավորություններին, որոնք այն ընձեռում է։ Նախարարը նշել է, որ հաշվի առնելով այդ ուղղությամբ վրացական կողմի կուտակած փորձը՝ բարեկամ Հայաստանը կարող է մշտապես ակնկալել Վրաստանի աջակցությունը:
Սադոյանը ներկայացրել է այս տարի Երեւանում կայանալիք Ֆրանկոֆոնիայի միջազգային կազմակերպության գագաթնաժողովի վերաբերյալ մանրամասներ, Զալկալիանին նշել է, որ Վրաստանն այդ խոշորամասշտաբ միջոցառմանը ներկայացված կլինի բարձր մակարդակով:
Դեսպանն ընդգծել է Հայաստանի քաղաքացի հանդիսացող սիրիահայերի՝ Վրաստան մուտքի հետ կապված խնդիրների շուտափույթ լուծման կարեւորությունը, ընդգծելով, որ սիրիահայերը, ՀՀ լիարժեք քաղաքացիներ հանդիսանալով, չպետք է եղբայրական Վրաստանի տարածք մուտք գործելու խնդիրներ ունենան։
Զրուցակիցները մտքեր են փոխանակել նաեւ հայ-վրացական տնտեսական համագործակցության միջկառավարական հանձնաժողովի աշխատանքների վերաբերյալ՝ խոսելով այն քայլերի մասին, որոնք հնարավորություն կտան մոտ ապագայում կազմակերպել հանձնաժողովի նիստը:
Շաբաթասկզբին Հայաստանի արտգործնախարար Զոհրաբ Մնացականյանը հեռախոսազրույց էր ունեցել Վրաստանի նորանշանակ արտգործնախարարի հետ:
Հիշեցնենք, Վրաստանի նոր կառավարությունը գլխավորում է Մամուկա Բախտաձեն, նա վարչապետի պաշտոնում Գիորգի Կվիրիկաշվիլիին փոխարինեց այս ամիս:
