ԱՄՆ-ում քննարկվում է ճանապարհային քարտեզ, որով ՀՀ-ն և Ադրբեջանը կձևավորեն խաղաղության փաստաթուղթը․ Արամ Սարգսյան. ՏԵՍԱՆՅՈՒԹ

ԱՄՆ Պետքարտուղարությունից «Ազատությանը» փոխանցել են, որ պաշտոնական Վաշինգտոնը Բաքվին ու Երևանին խնդրել է դիտարկել՝ ինչպես լավագույնս պաշտպանել Լեռնային Ղարաբաղի բնակչության իրավունքներն ու անվտանգությունը, և որ այդ հարցն առանցքային է Հայաստանի և Ադրբեջանի միջև հակամարտությունում:

«Չափազանց շատ կյանքեր խլած ու շատ երկար տևող հակամարտությանը տևական կարգավորում գտնելու միակ ճանապարհն այն է, որ, ի վերջո, այս մարդիկ իրենց ապահով զգան իրենց տներում, և նրանց իրավունքները պաշտպանված լինեն։ Միացյալ Նահանգներն աջակցում է «երկարատև, կայուն համաձայնությանը, որը խաղաղության հիմք կարող է դնել»,- ասել է Պետքարտուղարության խոսնակը։

«Հանրապետություն» կուսակցության ղեկավար Արամ Սարգսյանի տեղեկություններով՝ ԱՄՆ-ում քննարկվում է ճանապարհային քարտեզ, որով կձևավորվի խաղաղության փաստաթուղթը։

«ԱՄՆ-ն ձգտում է հասնել վերջնական որոշակի արդյունքի՝ խնդիրը ԱՄՆ-ում լուծել, հասնել լուծման, որն անփոփոխելի կլինի։ Վայնասուն են դրել ՌԴ իշխանությունը և նրա 5-րդ շարասյունը ՀՀ-ում՝ ԱՄՆ-ում բանակցության դեմ, իբրև թե վտանգներ են տեսնում, բայց իրականում խաղաղություն չեն ուզում։ ԱՄՆ-ի հանդիպումից վտանգ չկա։ Բայց երբ ՀՀ-ն մենակ մնում է ՌԴ-ի դաշտում՝ ռուս-թուրքական դաշինքի դեմ, դա է վտանգավոր։ Ալիևը կուզենար Մոսկվա գնալ, որտեղ ինչի ուզում է՝ հասնում է»,- Factor TV-ին տված հարցազրույցում ասաց Արամ Սարգսյանը։

Հարցազրույցն ամբողջությամբ՝ տեսանյութում։

Ռոբերտ Անանյան