15.01.2025 | 20:22
Հայաստանի մի շարք շրջաններում մառախուղ է
Դատախազությունը չունի այն լիազորությունները, որն անհրաժեշտ է․ պետք է վերանայվի․ Արմեն Խաչատրյան․ ՏԵՍԱՆՅՈՒԹ
Քաղաքականություն
03.05.2023 | 16:33
Դատախազությունը չունի այն լիազորությունները, որոնք անհրաժեշտ են առկա խնդիրների լուծման համար՝ հատկապես իրավապահ մարմիններում և հանցավորության դեմ պայքարում։ Ազգային ժողովում Դատախազության 2022 թվականի գործունեության մասին հաղորդման քննարկման ժամանակ այս կարծիքը հայտնեց «Քաղաքացիական պայմանագիր» խմբակցության պատգամավոր Արմեն Խաչատրյանը։
Պատգամավորը, թվարկելով դատախազության լիազորությունները, ընդգծեց, որ անհրաժեշտ է վերանայել դրանք։ Խաչատրյանի դիտարկմամբ՝ նաև քրեական դատավարության ոլորտում պետք է փոփոխություններ իրականացնել՝ հաշվի առնելով առկա թերությունները։
Խաչատրյանն անդրադարձավ նաև «Հայաստան» խմբակցության քարտուղար Արծվիկ Մինասյանի հարցին։ Նշենք, որ Արծվիկ Մինասյանը Գլխավոր դատախազ Աննա Վարդապետյանից հետաքրքրվել էր, թե արդյոք վարչապետ Նիկոլ Փաշինյանի մերձավորներից կամ ներկա իշխանություններից որևէ մեկն անցնո՞ւմ է ապօրինի գույքի բռնագանձման գործերով։
«Ես առաջարկում եմ, որպեսզի Արծվիկ Մինասյանը ներկայացնի դեպքեր կամ գոնե մեկ դեպք, ինչին ինքը տեղյակ է, որ պաշտոն զբաղեցնող որևէ անձ՝ իշխանական թիմից կլինի, թե ոչ իշխանական թիմից, այսօր Հայաստանի Հանրապետությունում ձեռք է բերել գույք, որի նկատմամբ կասկածներ կան, որ դա ապօրինի է։ Ես դա ամենայն պատասխանատվությամբ եմ ասում, որ եթե նման դեպքեր նշվեն, ես անպայման միջնորդելու եմ Գլխավոր դատախազությանը, որպեսզի վարույթ սկսվի այդ փաստերով։ Ցանկացած պաշտոնյա այսօր, եթե նման վարքագիծ դրսևորի, այդ բեռը կրում եմ նաև ես, որովհետև նման վարքագծի անբարենպաստ հետևանքները կրում ենք մենք յուրաքնաչյուրս։ Եվ մենք հետամուտ ենք լինելու, որ նման բաներ չլինեն։ Ես անպայման սպասում եմ Արծվիկ Մինասյանի կողմից կոնկրետ փաստ կամ փաստեր ներկայացնելուն»,- նշեց Խաչատրյանը։
Մանրամասները՝ տեսանյութում։
